Johan Lund Olsen: Inatsisartunit tunuarniuteqalersaanngilanga

Johan Lund Olsen aperaarput Inatsisartunit ilaasortaanerminit tunuarniuteqalersaarnersoq:

- Naamerluinnaq, tassami inatsisit tunngaviusut 1953-imeersut toqqammavigisariaqarakkit.

Tunngaviusumik inatsimmi paragraf 3-mi allaqqavoq, eqqartuussisarneq eqqartuussisut qullersaaffigisassaraat aamma Inatsisartut Naalakkersuisullu pillugit Inatsisartut inatsisaanni paragraf 6-imi allaqqavoq, Inatsisartuni ilaasortaq eqqartuussivitsigut pineqaatissinneqarsimanngippat, tunuartinneqarsinnaanngilaq.

- Illusisimanermut atatillugu politiit misissuisussanngornerat iluarisimaartorujussuuara. Tassami piffissami sivitsulersumi, tassa ukiuni marlunngulersuni inuttut pasillerneqaqattaartuarsimavunga, tujorminartorujussuarmik. Taamaattumik politimesterip nalilersuisussanngornera toqqissisimanarisorujussuuara. Taamaalilluta suliaq eqqartuussivinnut suliassanngortinneqassanersoq takusinnaaniassagatsigu.

- Nunatsinni kikkulluunniit naapertuilluarneq tunngavigalugu eqqartuunneqarnissamut qulakkeerunneqartussaapput.

Johan Lund Olsen ualimut apersorneqarluni taama oqarpoq.

- Kikkut tamarmik naapertuilluartumik eqqartuunneqarnissamut qulakkeerunneqartussaapput. Taamaattumik kinaluunniit pinngitsuutinneqartussaavoq, eqqartuussivimmi inaarutaasumik allamik aalajangiisoqartinnagu. Tassa polimesterip misissuisussanngornera toqqissisimanartuuvoq, taassumami nalilerumaarpaa, eqqartuussisoqarnissaanut tunngavissaqarnersoq.

- Pisuussuteqanngitsutut imminut isigaanga, tassami allarpassuit sinerissameersut assigalugit illusinissamik qinnuteqaateqarnikuuvugut, qinnuteqaaterpullu allanit nalilersorneqarpoq.