Johan Lund Olsen (IA) NATO-p Inatsisartuni ilaasortaatitaasa ataatsimiinneranni kingornalu Station Nord-imut, Pituffimmut aammalu Nuummut angalanerannut peqataassaq
”Paasinarsiartuinnarpoq NATO-p – Nunani Issittuni immakkut aqqutinik nutaanik periarfissaqalerneranut atatillugu, aatsitassanik nutaanik piiagassaqalernerata, annertunerusumik uuliasiornerup gassisiornerullu, kiisalu annertunerujartuinnartumik umiarsuarsuit atorlugit takornariaqarsinnaalernerup kinguneratut Nunani Issittuni siunissami nutaamik sakkutooqarnikkut iliuusissani inissisimaninilu nalililiiffigeqqinniaraa. Tamanna nutaajuvoq, taamaammallu taamatut nutaamik ineriartornerup malinnaaffiginissaa uannut pingaaruteqarpoq, tassami NATO iliuuserisartakkaminik allannguippat issittuni inunnut taamatullu Kalaallit Nunaannut toqqaannartumik sunniuteqartussaavoq” oqarpoq Johan Lund Olsen.
Angalanermi peqataassapput nunat NATO-mut ilaasortat parlamentarikerii. Angalaqatigiit ilaatigut aammattaaq Inatsisartut Nunanut Allanut Sillimaniarnermullu Ataatsimiititaliaat ataatsimeeqatigissavaat.
Angalaneq pissaaq ulloq Folketingemi qallunaat aningaasartuutissanut inatsisissaanut siunnersuutip siullermeerluni oqaluuserineqarnerani. Taamaakkaluartoq Inuit Ataqatigiit NATO-p parlamentarikeriisa ataatsimiinnissaat pingaartinnerullugu peqataaffigissavaat. Inuit Ataqatigiit 2014-imut qallunaat naalakkersuisuisa aningaasartuutissanut inatsisissamut siunnersuutaannut oqaaseqaatitik qallunaat statsministerianut aningaasaqarnermullu ministerianut apuutereerpaat.
Johan Lund Olsenip Sara Olsvigimut sinniisuunermini Sara Olsvigip Folketingimi ilaasortaaffii ilaasortaaffigissavai. Ilaasortaaffiisalu ilagaat Folketingip NATO-mut parlamentarikerinik ataatsimiittartoqatigiivi.
