Johan Lund Olsen Folketingimi ilaasortaagallassaaq
IA sinnerlugu folketingimi ilaasortaq Sara Olsvig aamma Inatsisartuni ilaasortaasoq, Inatsisartut ukiaru ataatsimiilerpata, folketingimit sulinngiffeqassaaq. Inatsisartunut ukiormanna qineqqusaarnermini oqaatigisani, tassa Inatsisartuni sulinerminut piffissaqarnerujumalluni taamaaliorniarpoq.
Folketingimi sinniisussaa Johan Lund Olsen, Sara Olsvigip folketingimi sulinngiffeqarnerani sinniisuussaaq. Tamannalu taassuma qilanaaraa.
- Qilanaartorujussuuvunga aamma folketingimi ilaasortat arlallit danskit politikererpassuit ilisarisimareerakkit qilanaartupilussuuvunga ilasseqqinnissaannut, Johan Lund Olsen oqarpoq.
Inatsisartut ukiormanna upernaakkut ataatsimiinnikuunnginnerat pissutigalugu, Inatsisartut ukiaru ataatsimiinnissaat sivisussasoq, Johan Lund Olsenip ilimagaa. Taamaattumik taassuma septembarimi, oktobarimi, novembarimi immaqalu decembari ilanngullugu folketingimiinnissani naatsorsuutigaa.
Taassuma Sara Olsvigip ataatsimiititaliani ilaasortaaffii tamaasa ilaasortaaffigigallassavai, Sara Olsvigillu pingaarnerutillugit ingerlataasa isumaginissaat qilanaaraa.
- Naatsorsuutigivara Sarap folketingimi suliai assigiinngitsut tamakkua aamma ingerlateqqissallugit. Pingaartumik nunanut allanut tunngasutigut politikeqarnermut suliassat, sillimaniarnermut tunngassuteqartut. Assersuutigiinnarlugu nunanut allanut sillimaniarnermullu ataatsimiititaliaq, Grønlandsudvalgimi aamma siulittaasuuvoq, tassani amma suliat assigiinngitsut ingerlaavartut nangeqqinneqartussaapput, Johan Lund Olsen taama naggasiivoq.
