Johan Lund Olsen: Ammip qalipaataa tunngavigalugu immikkoortitsinianngilagut

Inuit Ataqatigiit ammip qalipaataa aallaavigalugu immikkoortitsinissaq akerlerilluinnarpaat inuiaalli kalaallit namminerisaminnik tunngaviusunik inatsiseqartariaqarnerat aalajangiusimallugu, taama Johan Lund Olsen partii Inuit Ataqatigiit sinnerlugit tusagassiuutinut allappoq.

Allagaq Palle Christiansenip Demokraatineersup Kalaallit Nunaanni siunissami ammip qalipaataa aallaavigalugu immikkoortitsilernissamik aarlerisaarutigisaanut akissutaavoq.

Demokraatit politikikkut oqaaseqartartuata, inatsisartunut ilaasortap Palle Christiansenip, naalakkersuisut siulittaasuata Qaqortumiit sapaatip-akunnerani kingullermi oqaaseqarneranut atatillugu sakkortuumik uparuaavoq, Hans Enoksenip ilaatigut Sermitsiamut oqaatigimmagu – Kalaallit Nunaanni namminersulivinnissaq eqqunneqareerpat tunngaviusumik inatsisissamut atatillugu siunnersuutigineqarumaartoq – ”nunanit allanit nunasisut sunik pisinnaatitaaffeqartitaajumaassanersut ” – issuaaneq naavoq.

- Allaanngilaq ammip qalipaataanik immikkoortitsisut aquttuunerisa nalaanni pisimasut, taamani Palle Christiansen oqarpoq.

Johan Lund Olseni maanna oqarpoq Inuit Ataqatigiit Maniitsumi juunip aallartilaarnerani ataatsimeersuarnerminni aalajangiukkaat inuiaat kalaallit namminerisaminnik tunngaviusunik inatsiseqalissasut – tassa Grundloveqalissasut.

Tamannalu piareersalereerumallugu Inatsisartut 2007-imi ukiakkut ataatsimiinnissaannut inuiaat kalaallit tunngaviusumik inatsisitaarnissaat anguniarlugu Isumalioqatigiissitamik pilersitsisoqassasoq siunnersuutigaa.

- Namminersorneq pillugu ataatsimiititaliarsuaq isumaliuutersuutiminik septembarimi tunniussisussaavoq. Isumaliuutersuullu inatsisartunut tunniunneqareerpat inatsisartuni oqaluuserisussaavarput namminersulivinnissamut atatillugu suliniutissat qanoq ingerlanneqarumaassanersut, Johan Lund Olsen erseqqissaavoq.