Joe Biden USA-mi demokraatinit piukkunneruneqartoq
USA-mi præsidentimut tullersortaasimasoq demokraatit præsidentinngorniunnissamut sassartitassaattut qinersineranni siuaraluttuinnarpoq.
![](/sites/default/files/styles/image_934x467/public/article_images/20200311-072244-l-1920x1182we.jpg?itok=hke1Jm2D)
Joe Bidenip Michiganimi ajugaanera unammillertaanut Bernie Sandersimut ajugaalluarneruvoq.
Allattoq Ritzau
Nutserisoq Mads Lynge
USA-mi demokratit "Minisupertuesday"-imik taallugu USA-mi præsidentitut sassartitassaminnik ippassaq qinersimmata, præsidentimut tullersortaasimasoq Joe Biden ajugaallualaavippoq.
Præsidentimut tullersortaasimasoq naalagaaffinni Michiganimi, Missourimi, Mississippimi Idahomilu ajugaasimasoq, kisitsisit takutippaat.
Joe Bidenip Michiganimi ajugaanera unammillertaanut Bernie Sandersimut ajugaalluarneruvoq.
Demokratit præsidentitut sassartitassaminnik Michiganimi 2016-imi qinersimmata Bernie Sanders Hillary Clintonimut ajugaavoq.
Michiganimi qinersivinni inunnik isumasiuinerit takutippaat Bidenip qinersisai tassaanerusut inuit 65-ileereersimasut, ingasaassinngitsut, taartumillu amillit.