Joe Biden New Hampshiremi ajugaasariaqartoq

Demokraatit præsidentimut sassartitassaminnik New Hampshiremi ullumi qinersipput, præsidentinngorniunnissaq sioqqullugu aappassaat qinersillutik.

Sassartitassanik qinersinerni ajugaasoq præsident Donald Trumpimut ukioq manna novembarimi qinersinermi unammillertaassaaq.

Demokraatit sassartitassaminnik New Hampshiremi qinersisarnerat kiap præsidentimut unammillertaanissaanut tikkuussisuugajuttarpoq.

Præsidentimut tullersortaasimasup, Joe Bidenip, qinigassanngortittunut allanut naleqqiullugu tapersersortikinnerunera, inunnik isumasiuinerit takutippaat. Joe Biden Iowami qinersisoqarnerani angusarissaarpallaanngilaq.

- Joe Biden ajugaassaguni sukataartariaqassaaq, qinigassanngortittut akornanniiginnarnissani qulakkeerumaguniuk, nittartakkap kongressen.com-ip aaqqissuisuunera, Anders Agner Pedersen, oqarpoq.

AAMMA ATUARUK Pete Buttigiegip Sanders Iowami ajugaaqqarfigaa

78-inik ukiulik, Bernie Sanders, inunnik isumasiuinerit naapertorlugit New Hampshiremi ajugaasussatut isikkoqarpoq.

38-nilli ukiulik, Pete Buttigieg, Indianami South Bendimi borgmesteriusimasoq, sakkutuuiarnerusorlu, Iowami uissuummissutigineqartumik ajugaanini pillugu Sandersimut unammillertaalluartutut isikkoqarpoq.

- Bernie Sandersip partiip iluani saamerliunerpaanera pissutaalluni ukiaru sassartitaasuunissaa amerlasuut ernummatigaat. Bernie Sanders New Hampshiremi ajugaassaguni unitsikkuminaassinnaassaaq, Niels Bjerre-Poulsen Syddansk Universitetimeersoq oqarpoq.

New Hampshiremi qinersinerup inernerata unnuaru aatsaat saqqummiunneqarsinnaanissaa naatsorsuutigineqarpoq.