Kalaallit Nunaat Danmarkiunngilaq. Jim Lyngvildip tamanna assilisamigut takutikkusuppaa.Assi: Jim Lyngvild

Jim Lyngvild Great Greenlandip atisaliaanik nittarsaassivoq

Kalaallit Nunaat Danmarkiunngilaq. Atisanik ilusilersuisup Jim Lyngvildip tamanna nittarsaassinermini oqaluttuariniarpaa.

Kamiit, kalaallisuut, puisip amiinik kavaajaliat modelillu kalaallit. Jim Lyngvildip Great Greenlandip atisaliaanik nittarsaassinera nutaaq saqqummeqqammerpoq.

- Suna tamaat kusanarluinnarniassammat assuutit, annoraat allallu ataatsimoortinnikuuakka, atisaliortoq Jim Lyngvild oqarpoq. Taassuma ammerivimmut Great Greenlandip atisaliaanik nittarsaassineq nutaaq suliaraa.

AAMMA ATUARUK Pisortanngortup amernik amerlanerusunik peqalernissaq sulissutiginiaraa

- Nittarsaassineq una amerikarmiunut, kineserinut, australiamiunut allanullu Kalaallit Nunaannik ilisimasaqanngitsunut sanaajuvoq. Eqqarsalersikkusuppakka: "Kakkaak, kusanangaaramik. Kulturi kusanaq. Kalaallit Nunaat tikikkusuppara", atisaliortoq oqarpoq.

Kalaalerpalussuseq amigaataavoq

Taassuma Great Greenlandip nittartagaani kalaalerpalussuseq maqaasisimavaa:

- Nittartagaat alakkarakku takuara skandinaviamut eqqaanartupilussuusoq. Modelit akutat, soorlulu aamma Norgemi illuaqqami assilisaasut. Tamanna assut uggorigakku.

AAMMA ATUARUK Puisit amiinut akigititassat isumaqatigiissutaasut

Tassami Jim isumaqarpoq puisip amiata Great Greenlandillu ilisarnaataat tassaasoq: Kalaallit.

- Kalaallit puisittarput. Kalaallit puisit pilattarpaat. Tamanna assini amigaataasoraara, taanna oqarpoq.

Assit Nuummeersunit inuttaqartinneqartut ammerivimmut nittarsaassilluassangatinneqartut, Great Greenlandimi pisortap Preben Møllerip oqaatigaa.

-Soorunami. Nittarsaanneqarnera tassuunakkut alloriarneq annertooq pileriaannaavoq.Tassa nalunngilarput Jim nunatsinnut uummateqartorujussuusoq. Taava uani takutiinnarpaa piniarnermut puisit tungaatigut tapersersuinera annertoorujussuusoq. Tassa nuannareqaarput suliffeqarfimmiit taamak iliuuseqarnera.

Puisip amiinik kavaajaliat tunisaanerulernerannik aamma kinguneqassangatinneqarput:

-Tassa taamaariaanaavoq. Uku assini atorneqartut ilaatigut qalipaatit sakkortuut soorlu sungaartoq pinkerlu. Taavalu uku nalinginnaasut naturalimik taasartakkagut, tassa neriuppunga taakua annermik sammineqalissasut ukiuni aggersuni, Preben Møller oqarpoq.

Angalanini nammineq akilerpaa

Kalaallit Nunaat Danmarkiunngilaq. Jim Lyngvildip tamanna assilisamigut takutikkusuppaa.

- Nuna namminersortuuvoq. Tamanna takutinniarsaraara modelit kalaallit atorlugit.

Atisaliortup nammineq piumassutsini atorlugu suliaq ingerlappaa.

- Akeqanngitsumik suliaraara. Tassami aningaasat isertinneqartut tamarmik piniartunut iluanaarutaassammata.

- Kalaallit Nunaannut angalanera aamma nammineq akilerpara. Pisinnaasara tamaat atorlugu piniartut akissaajarnaveersaarpakka.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat