Jette Larsen Arctic Umiaq Linemi pisortaaninngorpoq

Arctic Umiaq Linemi pisortaaninngortoq, 50-nik ukiulik, Jette Larsen tassaalerpoq nunatsinni inuussutissarsiornermik sulialinni arnani qaffasinnerpaamik atorfilik.

- Toqqarneqarnera tulluusimaarutigaara nuannaarutigalugulu, soorunalumi suliassakka pissangagaakka. Pisortaanertut toqqagaaninni arnaanera apeqqutaatinngilara, angallannermummi tunngasut ilisimasaqarfigillualernikuuvakka, Jette Larsen oqarpoq.

Arctic Umiaq Linemi siornagut sulereersimasoq

Air Greenlandimilu tuniniaanermut nittarsaassinermullu pisortaasoq Jette Larsen inupparsuarnit qinnuteqaqquneqarsimanerarpoq.

Suliassamini pingaarnersaanerarpaa sinersornerup akilersinnaasumik siunissami ingerlanissaa. Pitsaasumik neqerooruteqarsinnaaneq, umiarsuillu pisariaqartittuarneqarnissaat.

- Naak sinersortaat ataasiinnasoq, Sarfaq Ittuk, atorlugu Narsarsuarmiit Ilulissat tungaannut sinersorneq ingerlanneqassagaluartoq, inuiaqatigiit naammagisimaarinninnissaat ilimagaara, neriuppungalu tapersersorluarneqarumaarlunga, umiarsuarmilu inuttat kalaallit ingerlaannarnissaat anguniarpara Jette Larsen oqarpoq.

Arctic Umiaq Linemi pisortaaninngorami siulersuisuni siulittaasuunerminit Jette Larsen tunuassaaq.