Jessica kisimiilluni Nuummi ernisariaqartoq
Jessica Arnoldi 38-nik ukioqarluni pingajussaanik naartulerpoq, ukioqqortusereersimanerali pissutigalugu Nuummut erniartortussanngortinneqarpoq. Erninerani ajornartoortoqarsinnaammat nunatsinni immikkut ittumik ernisarfilimmi tassa Nuummi erninissaa qularnaannerpaavoq.
Jessica Arnoldip uini Tim Arnoldi Uummannami najugaqatigaa. Jessicap uini Tim saniminiinngitsoq erninissani aliasuutigingaatsiarsimavaa. Aappariilli Jessicap uiata, Tim Arnoldip meeraasa aallaqataanissaat akissaqartissimanngilaat.
Arlaannimmi pisoqaraluarpat
- Meerarmi arlaannik sugaluarpat – uangami sugaluaruma ilaquttagut najornavianngilakka. Uummannami najugaqarnerput nuannarisorujussuuvara. Manna kusanaqalunilu eqqissisimanaqaaq. Kisima erninissara aliasuutigingaatsiarpara, Jessica suli erninani oqarpoq.
Jessica peqqissumik 3,8 kiilumik oqimaassusilimmik 47 centimeterimillu angissuseqartumik maajip 19-ianni panissaarpoq. Erninera pilattaanikkut ernineruvoq, Jessica annikitsumik ernisullattaalereerluni erniffissamisut ullormi naatsorsukkamini ernivoq. Jessicap Nuummi napparsimmavissuarmi kiffartuunneqarnini tamaat ataatsimut ajunngilluinnartuinnarmik oqaaseqarfigisinnaavaa.
- Sanngiilligaluttuinnarlungali kiserliuleraluttuinnarpunga. Taamaammat sukkanerpaamik angerlarnissara kimigiisissutigaara, uimami meeqqamik ikiornissammanga. Sakkortuunik nipaallisaatitorama angalanitsinni tamalaartorujussuuvunga. Paneerarput aallaqqaammut qiasorujussuuvoq, maannali tamatta ajunngilagut, Jessica Arnoldi oqarpoq.
Pingaarnersiuisarnerat paasisinnaanngikkai
Uiusup Tim Arnoldip peqqinnissaqarfiit aningaasanik pingaarnersiuisarnerat paasisinnaanngilaa.
- Uummannami ukiumut agguaqatigiissillugu 34-t inunngortarput, arnat naartusut Nuummut Ilulissanullu angalanissaat ineqarnissaallu akilerneqartarpoq, aningaasat taakku illoqarfimmi napparsimmavimmi sulisussanut ajunnginnerusumik atorneqarsinnaagaluarput, Tim Arnoldi oqarpoq.
