Jess Svanep kinguartitsinissaq kisimi aalajangersimanngilaa

Qaasuitsup Kommuniani kommunalbestyrelsep ataatsimiinneranut kinguartitsisoq Jess Svanenaanngilaq, tassami Siumut Inuit Ataqatigiillu aaliangiussereersimapput ataatsimiinnermik kinguartitsisoqassasoq.
Allattoq Else Løvstrøm
septembarip 20-at 2010 16:34

Borgmester Jess Svane imminut illersorniarluni Qaasuitsup Kommuniani kommunalbestyrelsep ataatsimiinnera kinguarteqqusimavaa. Sooq akuliunnerluni Jess Svane ima nassuiaavoq:

- Ataatsimiinneq aallartinngitsoq uanga nammineerlunga sianersimavunga, ataatsimiinnermi eqqartorneqassaguma ataatsimiinnerup unitsinneqarnissaa oqartuutigivara, Jess Svane oqarpoq.

Ataatsimiinnerlumi unitsinneqarpoq, Jess Svanelli itisilerumanngilaa sooq qanorlu nammineq inuttut eqqartorniarneqarnerluni.

Paasinarsivorli Jess Svane kisimi kinguartitsinissamik kissaateqarsimanngitsoq:

- Ilisimanngilara gruppet marluk aningaasanut tunngatillugu eqqartuiniarnerminni tikinnissara utaqqerusullugu kinguartitsinissamik qinnuteqassamaartut, tassa immikkoortut marluupput taakkua, Jess Svane oqarpoq.

Sisamanngornermili Siumut aamma Inuit Ataqatigiit amerlanerussuteqartut isumaqatigiissutigereersimavaat ataatsimiinnermik kinguartitsisoqassasoq. Tamannalu Karl Kristian Krusep ima nassuiarpaa:

- Tassa oqareernittut aningaasatigut imaannaanngitsumik inissisimanitta malitsigisaanik aningaasatigut suli sipaarniaqqiffiusussamik ataatsimiinnissaq ingerlaqqinnissaanut paasissutissat borgmesteri peqataatillugu suliarerusussimavagut, taannalu aallaavigalugu kinguartitsineq toqqarsimavarput. Tassa akisussaanerpaartarisatta peqataalluni suliap suliarineqarnissaa qulakkeerusussimagatsigu, Karl Kristian Kruse oqarpoq.

Qaasuitsup Kommuniani kommunalbestyrelse pingasunngorpat ataatsimiissaaq, tamannalu sioqqullugu itinerusumik nassuiaasinnaanani Jess Svane oqarpoq.