Jess Svane: Qeqertarsuup Kommunea sapiitsuliorpoq

Qasigiannguit Kommuneani aningaasarsiorneq ukiuni kingullerni nukittoriartorsimanngimmat akileraarutaasartoq aappaagu taamaaginnassaaq 46 procentiuinnassalluni.

Akerlianik Qeqertarsuup Kommuneani akileraarutaasartoq 45 procentimiit 42 procentimut appartinniarneqarpoq.

Qeqertarsuup Kommunea aningaasarsiornikkut pikkorissimanerunerpa? Qasigiannguit borgmesteriat Jess Svane ima akivoq:

- Qeqertarsuaq sinnerlugu oqaaseqassanngilanga, isumaqarpungali sapiitsuliorlutik aalajangiisut. Akileraarutit akileraartitsiniaannarluni inissitaanngillat, akileraarutit tassaapput inuiaqatigiinni aaqqissuussaanitsinni akunnattumik isertitalinnut ilaatigut annertuumik atorneqartartut. Taamaammat akileraartitsiniaannarluni akileraarutit inissinneqarnikuunngillat aamma appaarujussuassagutta kialluunniit takusinnaavaa sorpassuarnik eqquisussaalluta, Jess Svane oqarpoq.

Qasigiannguit aamma Qeqertarsuup Kommunea-tut ittut ataatsimoortumik tapiissutinik annertuumik pisartagaqarput, akileraarutillu appartinneqassagaluarpata tapiissutit taakku annaaneqarsinnaapput, Jess Svane-p ilanngullugu oqaatigaa.

Avannaani kommunit 2009-mi kattussuunnissaat eqqarsaatigalugu sanngiiffiit nukittuffiillu tunuarsimaarutigineqannginnissaat, Jess Svanep aamma kajumissaarutigaa:

- Ataasialinngilagut kommunit avannaamioqatigiit naapisimaarluta. Sanngiiffigut nukittuffigullu tassani qalloqattaartarpagut, kajumissaarutigiinnarusupparalu taamatut tunuarsimaarneq pinnagu aammalu sanngiiffiit kannguginagit qallorneqassasut. Taamaliunngikkuttami takusinnaajunnanngilarput iluamik suut aaqqissuuttariaqarlutigit, Jess Svane oqarpoq.