Jess Svane borgmesteriuinnassaaq

Jess Svane Qaasuitsup Kommuniani kommunalbestyrelsemi ikinnerussuteqaleraluarluni borgmesteritut tunuarnianngilaq.
Allattoq Jette Andersen
decembarip 07-at 2010 14:43

Siumup maannamut suleqatigisimasaata IA-p naluneqanngitsutut suleqatigiinneq kommunalbestyrelsip ataatsimiinnerani kingullermi alarpaa, akileraarutip procentimik qaffannissaa taaseqataaffigalugu.

IA-illu Atassummik, Demokraatinik aammalu Kattusseqatigiit Partiiannik suleqateqarnissamik isumaqatigiissut ippassaq atsiorpaa, taakkualu aqqaniliugamik Siumup ilaasortaatitaanit quliusunit amerlanerulerput.

Borgmesterili unnerpoq, nammineq nuannaarluni:

- Isumaqatigiissut, ippassaq unnukkut nassiussuunneqartoq, atuarlugu uanni nuannaajallanngitsoorfiunngilaq, isumaqatigiissut tamakkiusavilluni kommunalbestyrelsip isumaqatigilluni suliakkiutaanik imaqarmat, borgmester Jess Svane illua tungiliuttut suleqatigiinnissamut isumaqatigiissutaa pillugu oqarpoq.

Isumaqatigiissut aqqaneq marlunnik immikkortoqarpoq, ilaatigut aningaasanik atuinerup ersarinnerusumik malinnaaffigineqarnissaanik kommunillu immikkoortoqarfiisa akornanni ataqatigiinnerusumik sulisoqalernissaanik imaqartumik.

Jess Svanep borgmesteritut inissisimaffik qimannianngilaa, aammalumi borgmesteriutilluni kommunit aqunneqarnerannnut inatsit malillugu kommuni aningaassaqarnermut ataatsimiititaliaani pissaaneqartumi siulittaasuuinnassalluni.

Taamaakkalluartorli Inuit Ataatigiit sinnerlugit kommunalbestyrelsemi ilaasortaq, Bendt B. Kristiansen, erloqinartorsiussanganngilaq:

- Inatsisit atorlugit tamatta sulivugut. Ataatsimiititaliap aalajangerneri siulittaasup malissallugit pisussaaffigivaa. Aamma kommunalbestyrelsep aalajangerneri borgmesterip suliassarai, Bendt B. Kristiansen oqarpoq.

Taassumali ilimagaa, Jess Svanep kommunalbestyrelsep suliakkiutai tamaasa suliarissagai:

- Kommunalbestyrelse aalajangiisinnaavoq, borgmesteri suliassaminik piaaraluni suliarinninngissimappat illikartissinnaallugu. Suliassallu taama ittut inatsit malillugu ingerlanneqartarput, Bendt B. Kristiansen oqarpoq.

Aammami Jess Svanep uppisinneqarsinnaanngorluni inissinnissani eqqarsaatiginngilaa:

- Aqutsinermut inatsit qiviaraanni, borgmesteri ukiuni sisamani atasussanngorluni inissitaavoq. Aamma taamatut ingerlassaaq, Jess Svane oqarpoq.

Taassumalu maanna neriuutigaa, politikikkut suliat assigiinngitsut suleqatigiilersunit assigiinngitsunik isumaqarfigineqartarnerat, Siumup atorluarsinnaagaa.

- Ukua isumaqatigiissutaat politikkikkut siunniutaapput, aamma suliamiit suliamut takusarumaarparput, qanoq aalajangertoqarniarnersoq, aamma nalunngilara, partii sorlerluunnit qanoq isummersinnaanertik pisaraat. Aamma tamakku tamarmik peqataajumaarput, borgmester Jess Svane oqarpoq.

Taanna 2008-mi borgmesterinngorpoq, inatsillu malillugu 2012-imi qinersisoqarnissaanut borgmesteriuinnaarsinnaalluni.