Jess Svane angerlarluni nassuiaaqquneqarpoq

Qaasuitsup Kommuniani aningaasat 4,5 millionit koruunit takussutissaqanngitsumik atorneqarsimanerat borgmesterip angerlarluni nassuiartariaqaraa kommunalbestyrelsemi Siumup gruppiata piumasaraa.
Allattoq Janus Maqé
septembarip 14-at 2010 05:40

4,5 millionit koruunit sumut atorneqarsimanersut takussutissaqanngimmat, Qaasuitsup Kommuniani Siumup gruppiata tallimanngormat ataatsimeeriaraluarneq kinguarteqquaa, borgmesterilu piaarnerpaamik angerlaqqullugu.

Karl Kristian Kruse Siumup gruppianeersoq ima oqarpoq:

- Aningaasat taama amerlatigisut atorneqarsimammata, tassalu 4,5 millionit koruunit, nassuiaanneqarusuppugut aningaasat sumut atorneqarsimanersut takussutissaqartinneqanngitsumik, Karl Kristian Kruse oqarpoq.

4,5 millioner koruunit aningaasarpassuupput, nassuiarsinnaanngiliuk sumut atorneqarsimanersut?

- Aatsaat tamanna nassuiarsinnaavara, nassuiaanneqareerutta sumut atorneqarsimanersut. Tassalu tamannarpiaavoq kommunalbestyrelsep ataatsimiinnissaanut kinguartitsinitsinnut, Karl Kristian Kruse oqarpoq.

Siumup gruppeata piumasarisimavaa borgmesterip, maannakkut feeriarluni sulinngiffeqartup, piaarnerpaamik uternissaa.

- Borgmester Jess Svane, akisussaasutut Ilulissanut piaarnerpaamik utertariaqarpoq nassuiaateqarlunilu, Karl Kristian Kruse oqarpoq.

Borgmester Jess Svane Ilulissanut tallimanngorpat uterniarluni KNR-imut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq