Jess Svane akitsuisoqassasoralugu ernumavoq
Borgmester Jess Svane, allakkatigut maajip 17-iani Namminersorlutik Oqartussanut apeqquteqaateqarpoq Ilulissat avannaatungaani Paakitsuni erngup nukinga atorlugu nukissiorfissaq aappaagu ukiup naalluinnarnerani atulerpat innaallagissamut akiliut qaffanneqassanersoq.
Apeqquteqarnerminut tunngavilersuutigaa Sisimiuni erngup nukinga atorlugu nukissiorfik atulermat, innaallagissamut atuinermut akiliut pingajorarterutaa pallillugu qaffanneqarsimmat:
- Ernumanartutut isigivara. Pissutigalugu Paakitsumi erngup nukinga atorlugu nukissiorfiliaq, Sisimiut eqqaani nukissiorfiliamut naleqqiullugu akisuneruvoq. Aammalu pilersugassai inuit ikinnerullutik. Taamaammat ernumaammernanngitsuunngilaq, Jess Svane oqarpoq.
Ilulissat avannaatungaani erngup nukinganik nukissiorfiliap sananeqarnera katillugu 600 million koruuninik naleqassangatinneqarpoq. Sisimiuni erngup nukinganik nukissiorfiup sananera 484 million koruuninik akeqartoq.
- Taava Ilulissani taanna nukissiorfiliaq akisunerujussuusinnarluni pilersugassai ikinneruppata, taava eqqoriarneq ajornarunnaakannerpoq suli qaffasinnerujussuarmik akittuiffigineqaratarsinnaanerat, Jess Svane oqarpoq.
Taassuma Namminersorlutik Oqartussani atorfinitseqqusiunnaarnerup kinguneranik, Namminersorlutik Oqartussani sulisut suliassamik ilaannut assassaarusimanersut ilanngullugu eqqarsaatersuutiginerarpaa. Apeqquteqareernerminiimmi qaammat sinnerlugu akissuteqarfigineqarnissaminut suli utaqqisinneqarami:
- Taamaassimappat kaammattuutigerusuppara Naalakkersuisut taassuma tungaa paasiniartariaqaleraat. Arlaatigut taamaaliorneq sunniuteqarnerlulinnginnersoq, apeqqutinut imaluunniit suliassanut allanut assigiinngitsunullu tunngatillugu, Jess Svane oqarpoq.
