Jess-ip Ove Karl nersualaarpaa
SIK-p siulittaasua naapertorlugu, Aatsitassanut Naalakkersuisoq kiisani isummaminik ersarissunik nalunaaruteqarpoq, Aatsitassarsioqatigiiffiup Greenland Minerals and Energy-p Kuannersuarni, Narsap eqqaaniittumi aatsitassanik uranitalinnik misissueqqissaarsinnaanissaanik aalajangernermigut.
Jess G. Berthelsenilli tupigusuutigaa, isumaqatigiissusiortut illuatungeriit erseqqissarniarluarsimagaat, Kuannersuarni aatsitassat uranitallit misissoqqissaarnissaannik akuersissummi tunngavigineqartoq, Qoornumi isumaqatigiissutip malilluinnarneqarnissaa - tassunga ilaalluni aatsitassat uranitaqanngilluinnarnissaannik piumasaqaatip aalajangiusimanissaa.
- Tassunga atatillugu tupigusuutigaara Naalakkersuisut imminnut, nuanninngikkaluarpalluunniit, aatsitassat uranitallit pillugit ammasumik oqallinneq aallartinngimmassuk, tamannami pigaluarpat tamatta paasissagaluaratsigu sumiinnerluta, SIK-p siulittaasua tusagassiutinut nalunaarummini ilaatigut allappoq.
Tassami Jess G. Berthelsen isumaqarpoq, Nunarput ’qaqugorsuarmut’ utaqqiinnarsinnaanngitsoq, apeqqutit inuiaqatigiinnut pingaarutillit taakku politikkikkut aalajangiiffiginissaannut, nangillunilu allalluni:
- Aalajangiisoqarpammi, tassani Alcoa, London Mining aatsitassaasinnaasullunniit allat pineqaraluarpata, taava inuiaqatigiit siumut aallarnisarneqassapput, suliffissanik ataavartunik nutaanik pilersitsinikkut.
Tusagassiutinut allakkani naggaserlugit Jess G. Berthelsen ima allappoq:
- Naalakkersuisoqatigiit illumut akiliutinik qaffaakuluujutigalutik, nerisassat akitsuusiitigalugit, kingullertullu juullertinnagu aningaasarsinissaq piiutigalugu, qaqugorsuarmut naatsorsuutigisinnaanngilaat qinersisartumik naammagiinnartuassagaat, qinikkatik ’imminnut pavungarsuaq pisillutik Nunatta siunissaanik eqqarsarusaartuarnissaat’, inuussutissaqarumalluta suliffissatsinnik nutaanik tuninnguarata, SIK-p siulittaasua, Jess G. Berthelsen allappoq.