Jess G. sakkortuumik assuarinnippoq
Jess G. Berthelsenip ilanngullugu oqaatigaa, Naalakkersuisut Siulittaasuulluni maanna kanngunartuussasoq.
Namminersorlutik Oqartussat Air Icelandilu timmisartuussinikkut immikkut isumaqatigiissuteqareersullu SIK-imi ilaasortat annertunerpaamik eqqugaassasut, SIK-imi siulittaasup Jess G. Berthelsenip, siulittuutigaa.
- Massakkut timmisartuussinermut akigititaasut ima qaffasitsigipput, SIK-mi ilaasortat qaammammut aningaasarsiatik tamaasa atorlugit illoqarfinnut nunaqarfinnulluuniit nikittariaqartarlutik, Jess G. Berthelsen oqarpoq.
Nunatta iluani angallanneq akitsoqqissappat, SIK-mi ilaasortanut allatuttaaq eqquissasoq Jess G Berthelsenimit oqaatigineqarpoq.
- Aningaasaateqarfitsinnut, feriefondetsinnut, ilinniartitaanermullu aningaasaateqarfitsinnut kinguneqassaaq. Tassani aamma pikkorissartitsinernut kinguneqarnerlussaaq, Jess G. Berthelsen oqarpoq.
Air Greenlandip nunatsinni angallassineq akitsuiffigissappagu, tamanna politikkikkut immikkut iliuuseqarfigineqartariaqartoq Jess G. Berthelsenimit neriuutigineqarpoq.
- Soorunami neriuppunga inatsisartut arlaatigut iliuuseqarumaartut, aqqusineqannginnatta allatut ajornartumik Naalakkersuinikkut landskasseminngaaniit angallanneq aningaasaliiffigineqartariaqarpoq. Taamaalilluni ilaasortavut akikinnerusumik angalasinnaaniassammata, Jess G. Berthselsen oqarpoq.
Aningaasaqarnermut Naalakkersuisup, Palle Christiansenip, Air Icelandimut angallanneq pillugu isumaqatigiissuteqarsimanera Jess G. Berthelsenip ima oqaasertalerpaa.
- Naalakkersuinikkut aalajangigaq, Inatsisartuni naluneqarpoq. Taamaammat demokratii sumiippa? Namminersorlutik Oqartussat, Air Greenland piginneqataaffigaat, maannakkullu piginneqatiminnut unammillerput, Jess G. Berthelsen naggasiivoq.
Tamanna pillugu Naalakkersuisut siulittaasuat Kuupik Kleist oqaaseqartinniarsimagaluarparput, maannali sulinngiffeqarluni angalammat iluatsissimanngilarput.
Taamaallaalli oqaatigaa Namminersorlutik Oqartussat Air Icelandillu immikkut isumaqatigiissuteqarsimanerat pillugu Naalakkersuisut ulluni qaninnermi immikkut ataatsimiissasut.
