Jess G.: Nunani allaneersut akissarsiakinnerusssanngillat
Tassa sulisartut ulluat malunnartillugu SIK-mut ilaasortat Nuup Katersortarfiani 200-t missaanniittut katerisimaarmata, siulittaasoq Jess G. Berthelsen oqalugiaammini sammisaasa ilamerngi.
Suliffeqarferujussuit sanaartorneqarneranni sulisartunik nunani allaneersunik tikisitsinissaq, SIK-p akerlerinngilaa.
Kattuffiulli piumasaraa, nunanit allaniit suliartortussat 1.000-likkaat nunatsinni isumaqatigiissutit malillugit akissarsiaqartinneqassasut. Tassalu sulianut assigiinnut akissarsiat assigiinnissaat, ukiorpassuarni suaartaatigisartik eqqaasitsissutigalugu:
- Taava inuiaat allat annikinnerusumik akilersussavagut ? Oqarlutalu uagut naammatumik aningaasarsiaqarutta ajunngilaq, inuiaat allat uagut susassarinngilagut, taamatummi inissinniarutta taava maani nunatsinni aamma assigiinngisitsilissaagut. SIK-p tamanna akueriumanngilaa, tassami suli suaartaat ilumoorukkamiuk "suliat assigiit akissarsiat assigiit", kattuffiup siulittaasua oqarpoq.
Taamaammat naalakkersuisut inappai avammut erseqqissumik nalunaaruteqaqqullugit:
- Tassalu 'Kalaallit Nunaata akueriumanngilluinnaraa avataanit suliartortut akilernerlunneqarnissaat.
Nunatsinni ulluinnarnut saakkutta, Inuit 3.000-nit amerlatigalutik, aatsaat taama amerlatigisut suliffissaarussimasut, Jess G. Berthelsenip, Nuup Katersortarfiani eqqaavai.
Taamaammallu suliffinnik ataavartunik pilersitsinissaq piumasaralugu. Pisuussutillu uumaatsut tamatumani atorluarneqarnissaat aqqutisaasutut tikkuarpaa:
- Kisianni SIK-p piumasaraa avataaniit suliartortut tuusintilikkaat Nunatsinni isumaqatigiissutit malillugit akissarsiaqartinneqarnissaat.
Aammali Nunatta iluani atukkat assigiinnginnerat SIK-p siulitatasuata maajip aallaqqaataani oqalugiarnermini eqqartorpaa, imermut innaallagissamullu akit sumi najugaqarneq apeqqutaalluni assiginnginnginerat oqaatigalugu:
- Ullumikkut nalunngilarput, imermut innaallagissamullu akiligassat 1.500 kronit sinnerlugit assigiinngissuseqarsinnaasut, apeqqutaalluni nunap ilaani sumi najugaqarneq. Tamanna eqqortuliornerunanilu nammaqatigiinnerunngilaq.
Naggataatigullu isumaqatigiinniarnissat tikippai. Pisortalli illuatungerisamik pissusilersornerat isumaqatigiinniarnertut taarusunngilaa:
- Oqartariaqarpunga, maannakkut pisortaninngaanniik isumaqatigiinniarnermik taasaq isumaqatigiinniarnerunngilaq, kisiannili qulaaniik naalakkiutigalugu peqqussutaavoq, taamaallaat ukiuni sisamani tulliuttuni 4 procentimik qaffassasugut.
Taamatut isumaqatigiinniartoqarneq ajorpoq, taava assigiinnarpaa Inatsisartut inatsisiliorunik, asuli piffissaajarata, SIK-p siulittaasua, Jess G. Berthelsen, sulisartut ulluanni maajip aallaqqaataani oqarpoq.