Jess G. Berthelsen: SIK-p kiffaanngissuseqalernissaq sorsuutigaa
- Angerneq namminersulivinnissamut aqqutissaavoq. SIK-p Kalaallit Nunaata kiffaanngissuseqalernissaa qasusuilluni uteriillunilu sorsuutiginiarpaa. Aamma kiffaanngissutsip aqqani nuna kalaallinit inuiannit aqunneqarlunilu ingerlanneqassaaq. Oqaatsillu pisortatigoortumik pingaarnerit tassaalissapput kalaallit oqaasii, SIK-p siulittaasua Jess G. Berthelsen aviisimut AG-mut oqarpoq.
Namminersornerullutik Oqartussat ataanni ukiut kingulliit 30-it ajoriinnagassaannginnerarpai, piffissap taama sivikitsigisup ingerlanerani Kalaallit Nunaanni ineriartornerup ilorraap tungaanut saatinneqarsimanera eqqarsaatigalugu. Pisoq inuiaat allat ukiut utritilikkaat arlallit artorlugit anguniartarsimasaat.
Aamma eqqaamaqquaa, Kalaallit Nunaat 60-ikkunni 70-ikkunnilu takornartanit navianartorsiortinneqarmat peqatigitillugulu nunaqarfiit inuerusarneqarnissaat danskit pisortatigoortumik politikkerisimagaat.
- Namminersornerulernissamik isumaqatigiissut iluaqutigalugu ineriartorneq maanna ilorraap tungaanut saatinneqarsimavoq, taamalu kalaallit inuiaat inuianngoqqissimapput tulluusimaartut, Jess G. Berthelsen oqarpoq.