Jess G. Berthelsen SIK-mi siulittaasutut ingerlaqqippoq

Jess G Berthelsen unammillerteqarani sulinermik inuussutissarsiuteqartut kattuffiani siulittaasuuginnasasoq, SIK-p ataatsimeersuarnerani ataatsimeersuaqataasunit 43-nit pattaaneqarluni

Ulloqeqqata siorna qinigaavoq. Sulisartut suliffissaqartuarnissaat pingaarnerpaajusoq Jess G Berthelsen oqarpoq, siulersuisullu qutsavigai suleqataalluarsimammata, taakkumi peqqutigalugit siulersuisutut inissisimagami.

-Immikkoortortaqarfiit aamma qutsavigiumavakka ulluinnarni nukittorsaajuarmata, taakkuuppummi tunuliaqutarilluinnarlugit massakkut SIK-p taamatut ingerlaneranut, Jess G. Berthelsen oqarpoq.

Ilanngullugu oqaatigaa siulittaasoq kisimi ingerlatsisinnaanngimmat tunuliaqutaminik tapersersorteqarnissaa ingerlatsisinnaanngimmat, qinigaaganinilu tuppalliutigaa.

-Neriorsuutigaara sapinngisamik pitsaanerpaamik ilaasortatta qinersinerat ulluinnarni atugaasa pitsaanerpaamik aaqqiivigineqarnissaasa anguneqarnissaat suliaqassallunga, Jess G. Berthelsen oqarpoq.

Jess G. Berthelsen-ip sulissutigineqartussatut pingaarnerpaasutut oqaatigaa, ilaasortat suliffissaqartuaannarnissaat, naalakkersuinikkullu ataavartunik suliffissanik pilersitsiuarnissaq, SIK-llu nammineq aningaasaateqarfitik aqqutigalugit suliffissanik nutaanik suleqataanissaa, SISA-llu, soraarnerusutisiaqarnissamik aningaasaateqarfiup aamma peqataanissaa pingaaruteqartoq.

Josef Therkelsen SIK-p siulittaasuata tulliatut ingerlaqqippoq, allattaanertut aamma Beathe Hendriksen ingerlaqqippoq.