Jess G. Berthelsen massakkut naliliiumanngilaq

Siumukkut siuttoralugit Naalakkersuisoqarnera, Utoqqaat peqatigiiffiata iluaraa, NuSuKaminngaanniillu aamma isorinnittoqanngilaq.
Sulinermik Inuussutissarsiuteqartut Kattuffiata, SIK-p, siulittaasua Jess G. Berthelsen oqalugiartunut aamma ilaavoq. Suliffissaaleqisullu amerliartuinnavissut eqqarsaatigalugit Naalakkersuisut ukiup ataatsip ingerlanerani angusimasaat qanoq ittuunersut, taava apeqqutaalerpoq:

- Tassa ajuusaarnartumik suliffissaaleqineq ukiuni massakkut tallimanngortuni annertusiartuinnarsimavoq. Taamaattumik ukiup ataatsip ingerlanerinnaani nalilersuiniarneq ajornakusoortorujussuuvoq, tassami naatsorsuutigineqarsinnaanngilaq ukiuni sisamani siuliini suliffissaaleqinerup annertusiartuinnarsimasup ukiup ataatsip ingerlanerinnaani illuanut saatsinneqarsinnaanera, kisianni aamma oqalugiarninni taanna oqariartuutigaara massakkut suliffissaaleqinerup annertunerujussua tamatta suleqatigiilluta, ikioqatigiilluta, sapinngisamik appasinnerpaamik inissinniartariaqaripput, Jess G. Berthelsen oqarpoq.

Naalakkersuisut maannamut angusarisimasaat, tassa suliniutinut angisuunut inatsit nutaaq, uranimullu naaggaarluinnarnerup atorunnaarsinneqarneranik aalajangerneq SIK-mut ilaasortanut  iluaqutaanerulissasut, taassuma maanna neriuutigaa:

- Maannakkut sakkussat pingaarnerit marluk tassa aaqqiivigineqareerput, tassa suliniutinut angisuunut inatsimmut arlalitsigut ilorraap tungaanut aaqqiisoqarpoq, taavalu aamma uranimut naaggaarluinnarneq atorunnaarsinneqarpoq, taamaattumik neriuutigaarput ukiuni tulliuttuni aatsitassarsiorneq aallartissasoq, neriulluta taanna aqqutigalugu suliffissaaleqinerup ukiuni tulliuttuni milleriarsinaanera, Jess G. Berthelsen oqarpoq.

Maannamut Naalakkersuisut ivertinneqarmatali suliffissaaleqisut amerleriaannarsimapput, siulianilu Naalakkersuisuusimasut angusarisimasaannut taamaammat naleqqiussinissaq maanna piffissaanngitsoq, SIK-p siulittaasuata oqaatigaa:

- Ukiup ataatsip ingerlanerinnaani naliliiniarneq ajornakusoortorujussuuvoq, taamaattumik ukioq ataaseq qaangiuppat apereqqikkumma ersarinnerusumik tassunga tunngatillugu immaqa akisinnaassajunnarsivunga, SIK-p siulittaasua Jess G. Berthelsen oqarpoq.