Jess G. Berthelsen: Lars-Emil Johansen pingaaruteqartumik suliaqarpoq

Lars-Emil Johansenip marloqiusamik atorfeqarnera, tassa aningaasaqarnermut nunanullu allanut naalakkersuisuujutigaluni folketingimut ilaasortaanera, SIK-p siulittaasuata Jess G. Berthelsenip ajoriffissaqartinngilaa.

Lars-Emil Johansenip marloqiusamik atorfeqarnermigut akissarsiarissaartuunissaa oqallisigineqartariaqanngitsoq, Jess G. Berthelsenip oqaatigaa, suliassalli nunatsinnut pingaaruteqartut naammassilluarneqarnissaat pingaartuutinnerullugit oqaatigalugu:

- Lars-Emil Johansenip aningaasarsiassai oqaaseqarfigerusunngilakka, folketingimili inissisimagallarniarmat nuannaarutigaara. Ataatsimiititaliami pingaaruteqartumi inissisimagami, namminersulivinnissarlu pillugu isumalioqatigiissitaliamiinnermigut SIK-p anguniagaannik suliniuteqarmat, Lars-Emil Johansenip inissisimagallarniarnera ajoriffissaqartinngilarput, Jess G. Berthelsen oqarpoq, nangillunilu:

- Folketingimi ilaasortaatitavut marloqiusamik inissisimareerput, tassa folketingiitigalutik inatsisartuni inissisimammata, taannalu nutaarsiassatut ilissinninngaanniit oqariartuutigineqassappat tupigusuutigikulussavarput taama inissisimasoqareermat. Maanna anguneqalersut suliniutigineqartullu anguneqalermata, tamakku pingaarnerutippagut, SIK-p siulittaasua Jess G. Berthelsen sinerissami angalaartoq oqarpoq.