Jess G. Berthelsen: Ilaasortatta akissarsiaat iluarsiivigineqarlik

SIK-p ilaasortami akissarsiaat pissusissamisoortutut isiginngilai, aammalu SIK-mut ilaasortanut Royal Greenlandip suliffeqafiutaani atugassarititaasut SIK-p naapertorlugu akuersaarneqarsinnaanngilluinnarlutik. Angerlartitsiinnartarnerpassuit, tamatumalu kingunerisaanik akissarsiarineqartut ikilisarnerinut sulisitsisut taartisiaqartitsineq-ajorlutik, tamannalu pissutigalugu akissaatit pillugit isumaqatigiissutissap isumaqatiginninniutigineqarneranit SIK tunuaannarpoq.

-Taamaattumik Royal Greenland matumuuna kajumissaarniarparput sulisartunut maani nunami napatitsisunut nalequttumik qaffaaqqullugu. Aammalu piginnittut suliffeqarfiutiminni aningaasarsiaritinneqartunut minnerunngitsumik Royal Greenland-imi sulisunut aningaasarsiatigut atugassarititaasut pillugit isummeqqullugit, tassami suliffeqarfissuaq Royal Greenland A/S inuiaqatigiinnut tamanut qanoq annertutigisumik attuisartoq ilisimaneqarmat, SIK tusagassiorfinnut nalunaaruteqarluni taama allappoq.

Royal Greenlandip Sulisoqarnermut pisortaa Søren Olsen Damgaard KNR-imit isumaqatiginninniarnerit pillugit oqaaseqartinniaraluaratsigu ataatsimiimmat oqaaseqartissinnaasimanngilarput. Inuit attuumassutillit ataatsimiikkunnaarpata Royal Greenlandimit oqaaseqartitsissaagut.