Jerusalaat aaqqiagiinngissutaajuarsinnarpoq
Israelip ministeriunerata Ehud Ohlmertip nalunaarutigaa, Palæstinami namminersornerusut siuttuata Mahmoud Abbasip illoqarfiup Jerusalaap siunissami qanoq inissisimalernissaata oqallisiginissaata kinguartinneqarnissaa akuersaarsimagaa. Ullumili Abbas Jordanimiut aviisianni TAAMAATTOQANNGILLUINNARTOQ issuarneqarpoq.
Aqagu nunat taakku siuttuisa illoqarfiup Jerusalaap siunissaa oqaloqatigiissutigisussaagaluarpaat. USA-p præsidentiata George W. Buship siornali novemberip qaammataani sulissutiginninneragut isumaqatiginninniartarnerit pilersitat, Bush januaari 2009-mi tunuartinnagu naammasseqquneqarsimapput. Isumaqatiginninniarnerilli isusiffissaanngiusartunik aporfissaqartuarsimapput. Jerusalaalli siunissaata oqallisiginissaa avaqqunneqarsinnaanngitsoq, Abbasip siunnersuisuisa erseqqissartuarpaat. Isumaqatiginninniarnernut aporpiujuarpoq Israelimiut Palæstinami nunanik tiguagaanni nunasisut sanaartortuarneri, Jerusalaamilu juutit immikkoorluinnarlutik aggulussimaneri, Palæstinamiut kamannerinut ilasaataasut.
Maanngaanniit ilisimatitsissutigiinnassavarput, Palæstinami nunaminertanik juutit tiguaaqqanerat, nunarsuatsinni inatsisinik immikkut ilisimasallit naapertorlugit, tiguaaqqaneq nunarsuarmioqatigiit inatsisaannik unioqqutitsinerummat.
