Jersey-mut angalaqataajumanngilaq
Inatsisartut Akileraartarnermut Akitsuusiisarnermullu Ataatsimiititaliaata Tuluit Nunaata Frankrigillu akornannut qeqertamut Jersey-mut, ilaatigut ingerlatseqatigiiffinnut appasittumik akileraartitsisartutut ilisimaneqarluartumut, septemberip arfineq-aappaanit aqqaneq-aappaannut paasisassarsiornissaanut, Demokraatit ataatsimiititaliami ilaasortaatitaat Per Skaaning peqataajumajunnaarpoq.
- Nunani allani aningaaseriveqalernissamut oqallinneq Nunatsinnut atorsinnaanngikkallarpoq, suliffeqarfiit aningaasarsiornerat pillugu inatsit Folketingimit taamaallaat aalajangiiffigineqarsinnaammat. Ilimaginngilluinnarparalu, akileraartarnikkut avaqqutaarinninnissamut periarfissiisumik inatsiseqalernissamut akuersaartoqarnissaa. Per Skaaning taama oqarpoq.
Per Skaaning Grønlandsbankenimi sulisuuvoq, isumaqarporlu, nunatsinni aningaaserivinni marluusuni paasissutissat pisariaqartinneqartut tamaasa ataatsimiititaliap pissarsiarisinnaagai, taamaattumillu ilaasortat sisamat allatsillu nunatta karsiata akiligaanik angalasoqartariaqanngitsoq.
Ataatsimiititaliap Jersey-mut angalanissaa Inatsisartut siulittaasoqarfiata akuerereersimavaa, ataatsimiititaliallu siulittaasua Jørgen Wæver Johansen allappoq, ilaasortat amerlanerussuteqarteqartut isumaqartut, nunani tamalaani aningaasarsiornikkut pissutsinik Jersey-mi paasisaqarluarsinnaassallutik, naalagaaffeeqqamilu ingerlatseqatigiiffinnut oqinnerusumik akileraarusersuinerup aningaasatigut ineriartornermut iluaqutaasimanera paasisaqarfigiumaneqartoq.
Jersey-mi innuttaasut 87.000-iupput, qeqertaq Tuluit Nunaata pigaa, EU-mulli ilaasortaanani. Jersey allaffissornikkut, aningaasarsiornikkut, inatsiseqarnikkullu namminerisaminik ingerlatsivoq.
