Jersey-liarneq angalaniutaannaavoq

Demokraatineersoq Per Skaaning isumaqarpoq Inatsisartut akileraartarnermut akitsuusiisarnermullu ataatsimiisitaliaasa Jersey-mut paasisassarsiorlutik angalaniarnerat asuli angalaniutaannaasoq.

- Ataatsimiisitaliap nunanut allanut angalanissaa imatut ajorinngilara. Nunanut allanut angalaneq Kalaallit Nunaannut iluaqutaasumik siunertaqarsimassappat.

- Kalaallit Nunaannulli iluaqutaanngitsumik angalaniarpata, uanga tamanna peqataaffigerusunngilara, tamanna aningaasanik asuleerinertut isigigakku, taama oqarpoq Demokraatit sinnerlugit akileraartarnermut ataatsimiisitaliamut ilaasortaq Per Skaaning.

Taanna isumaqarpoq, Tuluit Nunaata Frankrigellu akornannut Jersey-mut Inatsisartut akileraartarnermut ataatsimiisitaliaata angalaniarnera, akileraartarnikkut avaqqutaarinninnissamut periarfissiiginnarnerusoq.

Inatsisartut akileraartarnermut akitsuusiisarnermullu siulittaasua Jørgen Wæver Joharnsenip Jersey-mut angalanissaq akornutissaqarsorinngilaa.

- Inatsisartuni ataatsimiisitaliat tamarmik soqutiginarsinnaasunik eqqummaarilluinnarlutik ujaasiuartussaapput. Jersey-milu isertitanut aaqqissuussinermi 60 %-i isertinneqarpoq, tamannalu soqutiginartuuvoq, Jørgen Wæver Johansen oqarpoq.

- Nutaamik paasisassarsiorniarluni angalaneq ajoriffissaqartinngilara, siunertaqanngitsumilli angalasoqassappat tamatuma qanoq iluaqutaanissaa takusinnaanngilara.

Per Skaaning erseqqissaavoq, EU-mi nunat ilaasortat assigiissaarneqarlutik misissorneqartartut, ajorluinnartumilli takussutissaqarpata, EU allannguisoqarnissaanik kaammattuisinnaasartoq.

Taamatutaaq Per Skaaning naggataatigut aperaarput, angalanissaq taanna qanorpiaq isigineraa.

- Nunamut allamut angalaniutaannaavoq, ataatsimiisitaliallu sianigisariaqarpaa, angalanerminni innuttaasut aningaasaataat atorlugit angalanerussammat, Per Skaaning naggasiivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat