Jeremiassen: Nunamit allameersut pisuujupput aalisartut pisassaannik
- Massakkut GA-p pisortarisaa nalunaaruteqarnikuuvoq sinerissami fabrikkit tamarmik 2014-mi matuneqassasut. Taamanili siorasaarisoqareernikuuvoq allaat fabrikkit nunatsinniittut tamarmik matuneqassasut, Lars Mathæussen oqarpoq, Partii Inuit aalisarneq pillugu oqaaseqartartuat, Lars Mathæussen, oqarpoq. Tassalu taassuma sulisitsisut peqatigiiffianniit isornartorsiut isumaqatiginngilaa. Tamaammallu aalisarnermut naalakkersuisup Karl Lyberthip aalisartutut inuussutissarsiuteqartuunissamik piumasaqaat atuutilerseqqinniassappagu tapersersorniarpaa.
Aalisarnermik inuussutissarsiuteqartuunissamik piumasaqaat atuutilerseqqinneqassappat tunisassiortut Polar Seafooditut Royal Greenlanditullu ittut alisartitsissanerlutik imaluunniit tunisassiortitsissanerlutilluunniit aaliangertariaqalissapput. Taamaalippallu piginittut tunisassiorfinnik kilisaatinilluunniit tuniniaasariaqalissasut ernummatigalugu SIK-miit GA-miillu sapaatit akunenrat kingulleq oqarput.
Lars Matthæussenili ernumanngilaq:
- Oqareerpunga aalisartut tulaassassaqartillugit nunami suliffissaqartuassaaq, Lars Mathæussen oqarpoq, Partii Inuit aalisarneq pillugu oqaaseqartartuat oqarpoq.
Naalakkersuisoqatigiinni partii pingajuaninngaanneersoq Siverth K. Heilmann, Atassut, aalisartutut inuussutissarsiuteqartuunissamik piumasaqaat pillugu oqaaseqarnissaminut utaqqerusuppoq, suli oqaloqatigiissutissaqararnerat pissutigalugu, politikkeri nassuiaavoq.
Radioaviisi Aalisarnermut Naalakkersuisup siulia Ane Hansen, IA-minngaanniit, oqaloqatigivaa. Ane Hansen Naalakkersuisuunermini aalisartutut inuussutissarsiuteqartuunissamik piumasaqaat peersinnikuua, SIK-tullu aalisarnermilu tunisassiofiutilittut tamanna suliffiqarfinnik katatsinissamik pisoqarsinnaanera ernumassutigivaa.
- Isumaqarpunga tunisassiorfinni sulisut ilaat suliffitsik annaasinnaagaat. Siumup piumasaqaat atulerseqqinniarpassuk qanoq kinguneqarsinnaanersoq nalussanngilaat, SIK, sulisitsisut, uangalu Naalakkersuisuunikuusutut tamatta aalisartutut inuussutissarsiuteqartuunissamik piumasaqaat qunualugu nalunaarnikuugatta, Ane Hansen oqarpoq.
Siumumi Inatsisartut aalisarneermut ataatsimiitsitaliaanni ilaasortaanni isumaqatigiinneqarpoq.
- Nuna allaninngaanniit nuuttoq aningaasaatilissuuguni taava pisassanik pisiinnarluni massakkut aalisartunngorsinnaavoq, aalisartut allat inangerlugit, Nikolaj Jeremiassen oqarpoq erseqqissarlugulu nammineq Karl Lyberthi siunnersorsimallugu peqqussut atuutileqqissallugu. Nikolaj Jeremiassen isumaqarpoq tunisassiortut SIK-lu piffissaq ingerlanerani paasiumaaraat ilumoortumik iliorsimalluni.
- Kikkut tamarmik isumaqatigisinnaanngikkaat nalunngilara, saqqummeqqaarnera eqqarsaatigalugu. Kisianni pisut ingerlaleraangami paasinnittut amerliartortarput, Nikolaj Jeremiassen Siumumeersoq oqarpoq
Ukiami ataatsimiinnermi paasissavarput Siumup aalisakkanik nioqqutissiornermi qaffasissumi inissisimasut GA Polar Seafoodilu aamma suliatigut peqatigiiffiat mianersoqqutaat akerlilissaneraat.