Jeppe Kofodip oqaaseqartartuuffini tigoqqissinnaavai

Socialdemokratit sinnerlugit Folketingimut ilaasortaq Jeppe Kofod oqaaseqartartuuffini tigoqqissinnaassavai. Aviisimi BT-mi taama allaaserinnittoqarpoq.
Allattoq Mads Lynge
marsip 31-at 2008 07:37

Socialdemokratit inuusuttaasa Esbjerg Højskolemi poorskip nalaani ataatsimeersuarmata Jeppe Kofod arnamik 15-imik ukiulimmik ilaqarsimanera ileqqorippallaanngitsuliornertut socialdemokratit folketingimi ilaasortaatitaasa siulittaasuannit Carsten Hansenimit nalilerneqarpoq, ingasattumilli qisuariaateqarsimanini Carsten Hansenip nassuerutigaa.

- Isumakkeerfigineqarsinnaanngitsumik Jeppe Kofodip iliuuseqarsimaneranik oqalunnera ingasaallugu qisuariaateqarnermik tunuliaqutaqarpoq. Jeppe Kofod akuersaaruminaatsuliorpoq, oqaaserlu taanna atorsimassagaluarpara, Carsten Hansen BT-mut oqarpoq.

Jeppe Kofodip iliuuserisimasaanut tunngatillugu Socialdemokratit inuusuttaasa maalaaruteqarnerat tunngavigalugu qisuariaateqartariaqarsimanini Carsten Hansenip oqaatigaa.