Jensine Berthelsen Atassummit tunuarpoq

Jensine Berthelsen Atassummi qinigaalluartartoq, ukiuni pingasuni politikeritut sulereerluni Atassummit tunuarpoq.

Politikeritut sulineq unamminartuusoq Jensine Berthelsen-ip oqaatigaa, tunuarnerminullu peqqutaatippaa politikeritut sulisinnaannginnini, tusagassiortutullu sulileqqinnissani kissaatigigamiuk.

-Siullermik qujamasuttoruussuuvunga partiip periarfissikkaminga politikkikkut suliaqarnissannut periarfissikkaminnga, Jensine Berthelsen oqarpoq.

Jensine Berthelsen-ip ukiuni pingasuni sulisimanerminik inuttut minnerunngitsumillu politikkikkut suliaqarnermi tunngasunut anorersuarsiortarsimaqaluni oqaluttuaraa. Inatsisartunut suliaqarnerminik nammineq tunuarniuteqarpoq, kommunimullu qinersisoqarmat apriilimi qinigaagaluarluni suleqqusaanani.

-Misigisimavunga tassunga killeqartariaqartoq. Suna tamarmi ingerlasoq uanga uninngaannarusunngilanga, ingerlaqqikkusuppunga. Qinikkatut sulisinnaanngikkuma unamminartut allat ornittariaqarlugit misigisimagama, tusagassiortutullu ilinniarsimagama tusagassiortutut sulinissara siunniuppara, neriuutigivaralugu sulileqqissinnaassallunga, Jensine Berthelsen oqarpoq.

Jensine Berthelsen oqarpoq tusagassiortutut suligaanni politikeritut sulineq ingerlanneqarsinnaanngitsoq, taamaammallu tamakkiisumik politikkiminngaanniit tunuarnissani aalajangiullugu.

Politikeritut tunuartariaqarninini Jensine Berthelsen-ip sapernartissimavaa, qinersisut tatigaluni qinertarmassuk, inuttulli ingerlaqqittariaqarnini pissutigalugu toqqaasariaqarsimavoq, tusagassiortutullu sulinissani toqqarsimallugu.

Jensine Berthelsen-ip politikeritut uteqqissinnaanissani ammatippaa, siunissarli qanittoq ungasinnerusorlu eqqarsaatigalugit tusagassiortutut sulinissani siunniuppaa.

Jensine Berthelsen kingullermik inatsisartunut qinersisoqarmat 509-nik taaneqarpoq, Atassummiuni qinigaanerpaani pingajuulluni. Kommuninut qinersisoqarmat Nuummi 133-nik qinerneqarpoq, atassummeersunik Nuup kommunalbestyrelse-anut ataatsimik isertitsilluni.