Jensen Nielsenilu isumaqatigiissut nutaaq pillugu: Aningaasat suminngaanniissappat?
Illuatungiliuttuusut Naalakkersuisunngortussat isumaqatigiissutaat tallimanngormat atsiorneqartoq isumaqatiginartillugulu isornartorsiorpaat.
-Isumaqatigiissut tamakkiisumik isigalugu soorunami ajunngitsortaqarpoq. Inuit atugaannut tunngassuteqartut, meeqqanut, inuussuttunut utoqqarnullu atukkanut tunngassuteqartut annertuumik ukkatarineqassasut taanna isumaqatigissutiginikuuarput. Qulequttammi taakku pillugit suleqataaniarluta oqarnikuuvugut.
Partiini illuatungiliuttutut inissittussani anginerpaami Siumumi siulittaasoq, Erik Jensen (S), naalakkersuisoqatigiit Inuit Ataqatigiit Naleqqallu isumaqatigiissutaat pillugu oqarpoq.
Isumaqatigiissuutip nutaap ´nammaqatigiinneq, patajaassuseq siuariartornerlu´ qulequtarai.
AAMMA ATUARUK Isumaqatigiissummit tigulaarineq: Isummersuisit nutaat, inissaaleqisuerunneq Kuannersuarnilu suliniummik taamatitsineq
Isumaqatigiissummi naalakkersuisuulertussat Kuannersuarni aatsitassarsiulersaarnermi unitsitiniarlutik isumaqatigiipput. Paarlattuanillu meeqqanut inuuusuttuaqqanut, angerlarsimaffeqanngitsunullu immikkut naalakkersuisoqarfiliorlutik.
Isumaqatigiissulli arlalitsigut apeqqusernartoqartippaa.
- Qanorli tulleriaarisoqassanersoq qanorlu tamakkua aningaasalersorneqassanersut takujuminaatsipparput. Oqaatsit kusanartut, qulequttat assigiingitsorpassuit saqqummiussuunneqarput tigussaasumilli qanoq iliortoqarnissaanik tikkuussisoqannginnera maluginiarparput.
Isumaqatigiinneq ernumanerlu
Demokraatit siulittaasuat Jens Frederik Nielsen (D) taamatorluinnaq nipilimmik aamma isumaqarpoq.
- Tassami ataatsimut isigalugu amerlanertigut qulaavaartumik allanneqarnikuupput. Tigussaavallaanngillat, kisianni soorunami amerlasuutigut isumaqatigiiffeqarpugut aappaatigullu aamma ernumassuteqalaarluta, Jens Frederik Nielsen oqarpoq.
AAMMA ATUARUK Múte B. Egede Naalakkersuisut nutaat pillugit: Nuannaarlunga neriuuteqarpunga
Taassumalu Erik Jensenitoqqissaaq aamma isumaqatigiissummi sammisat ilaasa tigussaannginnerat tikkuarpai.
- Aaqqissuusseqqinnermik taasamik oqaaseqaraanni sumut tunngatinneqarnersoq nalunartorujussuuvoq. Taannami akileraartarnermut kisimi tunnganngitsoq oqaatigisinnaavara, ilaatigummi aamma utoqqarnut tunngasoqarpoq. Utoqqalinersiat qineqqusaarnermi eqqartorneqangaatsiarput. Aaqqissuusseqqittoqassasorlu maanna eqqartorneqarpoq. Kisianni taanna qanoq isumaqarpa?, Jens Frederik Nielsen (D) oqarpoq.
Isumaqatigiissut akuerineqarpoq
Isumaqatigiissut nutaaq Nuummi katuami tallimanngormat atsiorneqarpoq.
Tassanilu Naalakkersuisunngortut nutaat saqqummiunneqarput.
Inuit Ataqatigiit siulittaasuat Muté B. Egede Naleraqqamili siulittaasoq Hans Enoksen Inuit Ataqatigiit arfineq pingasunik naalakkersuisuutitaqassasut, Nalerarlu marlunnik naalakkersuisuutitaqassasut isumaqatigiipput.
Naak Atassut naalakkersuisoqatigiilernissamut isumaqatigiinniarnerni peqataangaatsiaraluarluni Naalakkersuisunut ilaalinngilaq. Atassutilli naalakkersuisoqatigiinnut tapersersortaaniarluni aalajangerpaa.
Naalakkersuisussat nutaat inatsisartunit apriilip ulluisa 23-anni tallimanngornermi akuerineqassapput.