Jensen Nielsenilu ilorrisimaanngitsut: Tamanna akuerineqarsinnaanngilaq

Naalakkersuisut Brobergimut tunngatillugu iliuusaat illuatungiliuttut ukiakkut ataatsimiinnerup ulluani siullermi ilorrisimaarutiginngilaat.

- Tamanna akuerineqarsinnaanngilaq.

Demokraatit siulittaasuat, Jens Frederik Nielsen ukiakkut ataatsimiinnerup ammarnerani ullormi tassani oqarpoq.

Tassuma Naalakkersuisut siulittaasuata Múte B. Egedep Naalakkersuisut Brobergip assuarliorneranut qanoq iliuuseqarniarnersut ersarissumik oqaaseqannginnera ilorrisimaanngissutigilluinnarpaa.

Naalakkersuisoqatigiit

Inatsiartuni qinigaaffiit 31-upput. 

Inuit Ataqatigiit aqqaneq-marlunnik qinigaatitaqarput. 

Naleraq sisamanik qinigaatitaqarpoq. 

Partiit marluk taamaalillutik ataatsimik amerlanerussuteqarput. 

Partii ikorfartortaasoq Atassut Inatsisartunut marluinnarnik qinigaatitaqarpoq.

Nunanut allanut tunngasunut naalakkersuisup nunarput Danmarkimik isumalluuteqartoqaannassanersoq pillugu siunissami taasisoqassagaluarpat naggueqatigiinnik inunnik tunuliaqutaqartut kisimik taasisinnaasariaqarneranik sapaatiummat oqaaseqarneranik pisoq aallaaveqarpoq.

Tamanna pissutigalugu Múte B. Egedep naalakkersuisuni akerlilingaatsiarpaa. Taassuma naqqiissummik allagaqarluni tamanna Naalakkersuisut politikkerinngikkaat nalunaarutigaa.

Maannalu – ullut tallimat qaangiutereersut – pisoq Naalakkersuisunut qanoq kinguneqassanerrsoq suli erseqqinngilaq.

AAMMA ATUARUK Ukiakkut ataatsimiinneq aallartippoq: Broberg ammaanersiornermi oqalugiaammi eqqaaneqanngitsoq

Múte B. Egedep ullumi oqaaseqarnera tusangiasaarinerinnaavoq. Tassa Naalakkersuisuni sapaatip akunnerata tulliani allannguuteqartoqassasoq.

- Naalakkersuisunit politikki ataatsimoortoq ilisimasariaqarparput. Aamma nunanut allanut tunngasunut naalakkersuisoq oqaaseqaraangat tamanna nalakkersuisut sinnerlugit oqaatigineqarnersoq imminuinnarluunniit tunngasuunersoq tatigisariaqarparput.

AAMMA ATUARUK Naliliineq: Brobergip pititsinerani ima pisoqarsinnaavoq

Siumup siulittaasuata Erik Jensenip naalakkersuisut siulittaasuanit akissuteqartoqarnissaa aamma amigaatigaa.

- Siumumi siorna aalajangiiffigisassatut siunnersuuteqarpugut, taanna nunatsinni qanoq sivisutigisumik najugaqarsimagaanni qinersisoqarsinnaaneranut tunngavoq. Tamakku oqallisiginerusariaqarpagut, taamaalilluta piffissami taasisoqartussanngornerani suut taasissutigineqarnissaat kikkullu taasisinnaanersut pikkorinneruffigissallutigu.

Partiip ikorfartortaasup Atassutip taassuma tunuarnissaa Múte B. Egedellu naalakkersuisuni nikititerinissaa kissaatigaa.

 

Suliaq naatsumik:

  • Aviisip Berlingskep nunanut allanut naalakkersuisoq Pele Broberg apersorsimallugu sapaammi saqqummiuppaa.
  • Taanna apersorneqarneqarnermini oqarpoq eqqartortikkusullugu Kalaallit Nunaata siunissami namminiilivinnissaanut taasisitsinermi kikkut taasisinnaatitaasariaqassanersut. Kalaallinit kingoqqisut kisimi taasisitsinermi peqataasinnaasariaqartut, Pele Broberg oqarpoq.
  • Taamali oqaaseqarnera Múte B. Egedep (IA), naalakkersuisunut siulittaasuusup, sakkortuumik akerlilerlugu ullup ingerlanerani naqqiuteqarfigaa. Aatsaallu siullerpaamik Pele Brobergimut akerliliivoq.
  • Atassutip Pele Broberg naalakkersuisunit tunuartinniarlugu naalakkersuisuni nikittoqartariaqarneranik ataasinngornermi piumasaqarpoq.
  • Demokraatillu taasisinnaatitaanermut oqaatigineqartut 'ajorluinnartutut' taavaat.
  • Pele Brobergilu Facebookimi takkajaarsuarmik ataasinngornermi unnukkut allaaserisaqarpoq. Tassani allassimasoq Berlingskep allaaserisamini 'isummanik' allanngortitsimasoq. Pele Brobergillu nammineq aamma 'inuiaat namminiilivinnissamut taasitinneqarnissaanni Inuit kisimik taaseqataasinnaasariaqarnerarlugit' issuarneqarsimani eqqunnginnerarpaa.
  • Berlingske allaaserisamini isummanik allanngortitsisimanani KNR-imut ataasinngornermi ilisimatitsivoq.


Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat