Jens Peter Berthelsen pillugu suliaq politiit suli ingerlappaat

-Pisimasumut atatillugu oqaatigisinnaavara, suliaq suli ingerlakkatsigu. Toqutsisup kinaanera suli paasinngilarput. Annerusumilli oqaaseqarsinnaanngilanga politiit paasiniaannertik ingerlammassuk, Morten Nielsen oqarpoq.

Toqutsineq ukioq ataasingajak qaangiupporli pimmat. Suliaq paasineqanngitsutut politiit unitsiinnassanerpaat?

- Pinerlunnerit sakkortuut sivisuumik paasiniaaffigereerlugit kinguneqanngikkaangata suliaq unikkallartissallugu aalajangersinnaasarpugut, taamallu pisoqaraangat susassaqartut tamaasa ilisimatittarpagut. Kisianni paasiniaanerput univinneq ajorpoq, akuttunngitsumimmi suliaq eqqartoqqinneqartarpoq paasissutissanillu nutaanik takkuttoqaraangat nangeqqinneqarsinnaasarluni, Morten Nielsen nassuiaavoq.

Jens Peter Berthelsenimmi toqutaaneranut atatillugu suliaq piffissaq aalajangersimasoq qaangiuppat unitsittariaqassavisiuk? Apereqqipparput.

- Naamik, toqutsinerit tamaasa, soorlu aamma pinerluttaalisitsinermi inatsisinik unioqqutitsinerit allat paasiniarlugit unitsinneq ajorpagut. Soorunami suliat ilaat nutaanngilisoorsinnaasarput, kisianni suliat politiinit kingunilimmik suliarisinnaasatsitut nalilikkavut ingerlaannartarput. Unalu toqutsinermut tunngasoq naammassitinnani nutaanngilisoornavianngilaq, politimesterip tullersortaa Morten Nielsen erseqqissaavoq.

Toqutsinerit paasiniarneqartut amerlanerpaartaat nunatsinni naammassineqartartut, vicepolitimester Morten Nielsen aamma oqarpoq.

Nunatsinni Politiit nalunaarusiaat malillugu ukioq 2006-imi toqutsinerit arfineq-pingasuupput toqutseriarnerillu aqqaneq-marluullutik.