Jens Ole Jensen Avannaata Qimussersuani ajugaavoq
Avannaata Qimussersua Uummannami ingerlanneqartoq naammassimmat Uummannarmiut ingerlallualaavissimasut paasinarsivoq.
Allattoq Mads Lynge
Uummannarmiu Jens Ole Jensen, 42-nik ukiulik, Avannaata Qimussersuani ajugaasuuvoq. Sermitsiaq nittartakkamini taama allaaserinnippoq.
Aqqut ingerlaarfissaq 40 kilometerinik isorartussuseqarpoq, Jens Ole Jensenillu atorpai akunneq ataaseq, minutsilu 43-t.
Jens Ole Jensenimut tulliulluni apuuttoq tassaavoq Edvard Samuelsen, aamma Uummannameersoq.
Jens Ole Jensen Edvard Samuelsenimit marloriarluni qaangerneqaraluarpoq, siulliullunili apuuppoq, ajugaallunilu.
Iluliarmiu Ville Siegstad normu 3-tut inissippoq.