Jens Napãtômut suliaq ataasinngorpat aalajangiiffigineqassaaq

Naalakkersuisuusimasumut Jens Napãtômut eqqartuussivimmi suliaq ataasinngorpat maajip ulluisa sisamaanni aalajangiiffigineqassaaq.
Allattoq Mads Lynge
maajip 01-at 2009 09:08

Jens Napãtôk' ilassinninnissamut kontomik piginnaatitaanerminik atornerluisimasutut Nunata Eqqartuussivianit qaammatini sisamani pinerluuteqarsimasunut inissiisarfimmiittussanngorlugu eqqartuunneqarpoq.

Eqqartuussisut Østre Landsretimersut maanna Nuummiipput Jens Napãtômut tunngatillugu suliaq naammassiartorniarlugu.

- Naalagaaffiup unnerluussisua unnerluussisut sinnerlugit sassarpoq, vicepolitimesteri Morten Nielsen Radioaviismut oqarpoq.

Jens Napãtômut tunngatillugu suliaq 2005-imi aallartippoq, Ineqarnermut attaveqarnermullu naalakkersuisuunermi nalaani ilassinninnissamut piginnaatitaanermik atornerluisimasutut Jens Napãtôk' paasineqarmat.

Ilassinninnissamut kontomi 120-riarluni piginnaatitaanerminik atornerluisimavoq, matumani 128.000 koruunit pineqarlutik.

Københavnimi Wonderbarimiissimanini ilaatigut pissutigalugu, Jens Napãtôk' naalakkersuisutut tunuarpoq, Namminersornerullutillu Oqartussaniit kingorna unnerluutigineqarluni.

Pinerluuteqarsimasunut inissiisarfimmi qaammatini sisamani inissinneqarnissamik eqqartuunneqarnini Jens Napãtôp suliareqqitassanngortimmagu Østre Landsretimeersut maanna Nunatsinniipput.