Jens Napãtôk'-mik eqqartuussineq aallartippoq
Jens Napãtôk'-p erseqqissarpaa ilassinninnermik kontominik atuinini naalakkersuisut akornanni ileqquusumit allaanerunngitsoq. Nassuiaallunilu atorfilittani paasiniaaffigisimallugit ileqquusut malissimanerlugit, atorfilittaminillu akineqarsimalluni: - Paasitikkumaarpatsigit ajornartorsiuteqalissaguit.
Ajornartorsiutillu amerlaqaat KNR-ip Nuuk TV-llu ilassinninnermut aningaasartuutaasimasunik uppernarsaataasunik qinnuteqarmata. 2004-imi ilassinnissutaasimasut koruunit 400.000-it sinnerpaat.
Jens Napãtôk' naalakkersuisutut juunimi 2005-imi tunuarpoq, siullermilli Namminersornerullutik Oqartussanut atukkaminik utertitsinissaminik itigartitsilluni. Utertitsinissamik piumasaqaat siullermik 473.000 koruuninut kisitsisitalerneqarpoq, taannali millisarneqangaatsiarpoq. Pinerluttaalisitsineq tunngavigalugu unnerluutiginninnermi 128.366 koruunit pineqarput. Taakku annermik nereqatigiinnernut namminerlu viinnitugassanik pisinernut atorneqarnerusarsimapput.
Namminersornerullutik Oqartussat pisortaanerat Kaj Kleist nassuiaasussatut siullertut killisiorneqarpoq, taassumalu erseqqissarpaa naalakkersuisut ilassinninnermik atuinerat ima killiffeqartoq: Napaattooq sioqqullugu, Napãtôk'-llu kingorna.
Malittarisassat ersarissisarneqarsimapput, naalakkersuisunngorlaallu massakkut ”naalakkersuisut mappiannik” tunineqartalerput, tassanilu atuarneqarsinnaavoq, suut akuerisaanersut, suullu ilassinninnermi akuerisaannginnersut.
Kaj Kleist-ip qanga oqarnera malillugu, naalakkersuisut 1993-imi kaajallaassitaq tunngavigalugu ilassinninnermut malittarisassaqarput.
- Nassuerutigissavaralu kaajallaasitaq assiginngitsunik naassuiarneqarsinnaammat, Kaj Kleist oqarpoq.
Kalaallit Nunaanni eqqartuussiviup Jens Napãtôk'-mik eqqartuussinissamut sapaatip akunnera naallugu inniminneersimavaa, piumasaralugulu naalakkersuisuusimasoq qaammatini sisamani pineqaatissinneqassasoq.
