Jens Napaattuup siulittaasup tulliatut tunuarnera taperserlugu akueraat

Siumup siulersuisuunerisa Jens Napaattuup siulittaasup tulliatut tunuarniuteqarnera taperserlugu akuersaaraat Hans Enoksen oqarpoq:

- Nammineerluni kissaateqarluni tunuarniuteqarnera tamakkiisumik taperserlugu akueraarput. Taama pisoqartariaqarnera ajuusarnaraluartoq, ulluni kingullerni pisut tunngavigalugit tunuarniuteqarnera akueralugu nalunaarfigaarput, Siumut siulittaasua Hans Enoksen oqarpoq.

Hans Enoksenip ilanngullugu oqaatigaa Jens Napaattooq siulersuisuunernit tunuarnissaminik pinngitsaalineqarsimanngitsoq.

Jonathan Motzfeldtip siulittaasup tulliatut inissinnera suli suleqatigiilluarnerminnik annerulersitsissasoq oqaatigaa:

- Aviisiliortut ilaatigullu inuiaqatigiinni isumaqartoqarpoq aporaatiinnavilluta ingerlasugut. Taamaattoqanngilluinnaqqissaarpoq, Juuntaarlu ulluinnarni sulinerput ajunngilluinnaqqissaarpoq. Akornutitut isiginngilluinnaqqissaarpara, akerlianik suleqatigiinnerput pitsaanerulissasoq oqariartuutigineqarpoq, Hans Enoksen oqarpoq.

Hans Enoksenip neriuutiginerarpaa, ukiut pingasut qaangiuppata Siumup ataatsimeersuaqqinnissaanut siulersuunerit ingerlaannassasut, taamatullu aamma Naalakkersuisunut ilaasortat aappaagu inatsisartunut qinerseqqinnissap tungaanut allanngoqqissanngitsut,

Hans Enoksenip neriuutigaa.