Assi: Camilla Dam/KNR

Jens Jakob qanga kalaaliaqqami pissutsit maqaasillugit isumataariataarpoq

Internetimi Wildfood.gl aqqutigalugu aalisartoq piniartorluunniit ukallinik puisinilluunniit najukkakkut aggiussitissinnaavat.

Nittartagaq nutaaq ataasinngormat aallartippoq. 

Taanna ateqarpoq Wildfood.gl, taannalu Jens Jakob Lennert-Sandgreenip qarasaani ineriartorsimavoq. 

Isumassarsiaa tassa, Nuummiut Wildfood.gl aqqutigalugu arlaannik inniminniisinnaanissaat, aalisartumut piniartulluunniit apuuttussamik.

Soorlu taxanik inniminniiginnarluni. Kisianni naammagittartariaqarpoq, piniagaq ullut arlallit utaqqineqartariaqarsinnaammat.

Kalaaliaratoqaq maqaasivaa

Aallartisagaa Jens Jakob Lennert-Sandgreenip meeraanerminit eqqaamasanit isumassarsiaavoq.
Taamani kalaaliaqqamukarnerit tamaasa misigisaqarnartarpoq, aalisartut piniartullu pisarisimasaannik aalisakkanik timmissanillu pissanganartoqartarmat.

- Meeraallunga eqqaamavara Kalaaliaqqami illinnartunik assigiinngitsorpassuarnik nioqquteqartoqartartoq. Ullumikkulli Kalaaliaqqamukaraanni ajoraluartumik misigisat allarluinnaasarput, Jens Jakob Lennert-Sandgreen oqarpoq.

Wildfood.gl-imut inniminniigaanni uppernarsaammik sianerfigineqanngikkaanni SMSimik nassiussisoqartarpoq.

Amatuma kingorna inniminniineq aalisartunut piniartunulluunniit periarfissalinnut annguppat piumasaq isumagineqassaaq.

- Qanoq sivisutigisumik utaqqinissamut pinngortitami pissutsit silalu apeqqutaassapput, taamaammat inniminnigaq ulluni arlalinni utaqqineqarsinnaasassaaq. Taamaammat pisisartutut naammagittartariaqarpoq, Jens Jakob oqarpoq.

Saarullik 100 koruunilik

Saarullik pisarineqarlaaq 100 koruuneqassaaq suluppaagarlu 110 koruuneqassalluni. Taamaammat nammineq pisarigaanni akikinneerarsuupput. 

Jens Jakob Lennert-Sandgreenilli inuit akisunaarinissaat annilaanngitiginngilaa. 

- Nioqqutissanut niuertarfinni pisiassanut qerisunut taarsiullugu pitsaanerusunik akisunerulaanik nioqqutissarserusuttartunut neqeroorut sammitinneqarsinnaavoq, taanna oqarpoq.

Ukaleq ilivitsoq aamma 300 koruunilerlugu inniminnerneqarsinnaavoq imaluunniit puisi angisooq ilivitsoq 800 koruunilerneqarsinnaalluni.

Nuummiinnaagallartoq

Siunissami Wildfood.gl nunap sinneranut siaruaassinnaassasoq Jens Jakobip neriuutigaa.
Jens Jakob Sandgreenip aallartisarnermini inuussutissarsiutigalugu aalisartut piniartullu marluk suleqatigilereerpai.

Taakkuuppullu Thorlak Skifte Nielsen kiisalu Adam Mike Kjeldsen.

Amerlanerusut peqataarusunnissaat Jens Jakobip neriuutigaa. 

- Amerlanerusut nalunaarnissaat naatsorsuutigaara. Pissangasorujussuuvunga, taanna oqarpoq.

Siunissami aamma piniartut aalisartulluunniit arlaat nittartakkakkut pisisartunnaaqalissappata, pisisartup piniartoq aalisartorluunniit aalajangersimasoq inniminniiffigisalersinnaanngorlugu aaqqissuussisinnaaneq, Jens Jakobip misilittarpaa.

- Assersuutigalugu Thorlak (t/piniartoq) ilisarisimalerukku, taava Thorlak aallaleraangat aperineqarsinnaassaanga; ”Thorlak aallalerpoq, ullumi arlaannik pisiffigerusuppiuk?”.

Aallartisarnissamut periarfissaq pitsak

Coronap tuniluunnerata ajornartorsiutigineqaleruttornerani sooq suliffeqarfimmik aallartisaarusuppa?
Ila piffissaq pitsaviuvoq, coronammi ajornartorsiutaanerata nalaani aalisartut piniartullu immaqa suliassaaleqipput, Jens Jakob oqarpoq.

Airbnb-p ingerlariaasaanut assinguvoq, soorlumi illu ineerarluunniit allanut attartortillugu. Nuummi aalisartut piniartullu una isertitaqarfigilersinnaavaat nutaaq, Jens Jakob nassuiaavoq.

- Coronap ajornartorsiutaanerani nutaanik aallartisaanissaq pitsaanerpaasoraara. Amerlasuummi saniatigut isertitaqalernissaannut neqeroorfiginissaat piffissanngorsoraara.

Inuussutissat nioqqutigisinnaanerinut malittarisassat malineqarnissaat, aalisartut piniartullu inuussutissarsiumminnut uppernarsaatillit akisussaaffigissavaat, Jens Jakob Sandgreen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat