Jens-Erik Kirkegaard: Aatsitassarsiortut allattorsimaffianni inissisimanerup apparnera ajortuunngitsoq
Jens-Erik Kirkergaard taama allappoq, Inatsisartunut ilaasortap, Naaja Nathanielsen paragraf 37 naapertorlugu apeqquteqaataanut akissummini. Naaja Nathanielsenip paaserusuppaa, sooq Fraser Institut-ip, ukiut tamaasa nalilersuisartup, Nunarput siorna taama appasitsigisumut inississimaneraa.
Nunat aatsitassarsiorfiusut politikkikkut allanngujuissusaat aatsitassarsiornermilu piumasaqaatinut ataatsimoortumik nunat maleruaasimanersut pillugit, Fraser Instutut ukiut tamaasa nalilersuisarpoq.
Jens-Erik Kirkegaardip erseqqissaatigaa, Nunarput 2012-imi normu 14-itut inissisimasimammat nunanit 96-iusunit. Taamaattumik nunat siorna paasiniaavigineqartut 112-iusut akornanni, normu 23-isut inissisimalernerput suli pitsaasutut nalilerlugu.
Jens-Erik Kirkegaardip aamma eqqaamaqquaa, nunarsuatsinni tamani nunani aatsitassarsiornermik ingerlatsisuni, Nunarput siorna pitsaanerpaatut, Europami aatsitassarsiornermut aningaasaliisartut ataatsimeersuarneranni toqqarneqarmat.
- Aatsitassanut tunngatillugu, nunap inatsisinik atortitsiviusup inissisimanermini appasinnerulaartummiinnera naliginnaalluinnarpoq, pissutigalugu ingerlatseqatigiiffiit immikkoortuni tassani avatangiisinik inuiaqatigiinnilu piujuartussamik iluaqutaasumik sunniuteqartitsinissamut allanullu aalajangersimasorujussuarnik arlalinnik piumasaqaateqarfigineqartalermata, Jens-Erik Kirkegaard akissummini allappoq.
Nunatta maanna normu 23-itut inissisimalerneranut pissutaaqataasinnaasut, Jens-Erik Kirkegaardip akissummini ima oqaatigai.
- Avatangiisinut suliassaqarfik Aatsitassnut suliassaqarfimmit akisussaaffigineqarunnaarsimavoq aamma Royalty-mik akiliuteqartarnissaq pillugu piumasaqaatinik atuutsitsisoqartalersimalluni. Allannguutillu taakku ingerlatseqatigiiffiit ilaannit nalorninartoqartinneqarsimasinnaapput, tamassumalu qanoq sunniuteqarsinnaanera paasitinnagu tamanna aalassassimaartitsisinnaalluni, Inatsisartunut ilaasortap, Naaja Nathanielsenip apeqquteqaataanut, Jens-Erik Kirkegaard ilaatigut taama akissuteqarpoq.