Jens B.Frederiksen: Nanoq-classertarneq tassa
- Allat sipaaqqugutsigik aamma uagut nammineq sipaartariaqarpugut. Soorunami første classimiilluni nuannernerugaluarpoq, uangali sooq Nanoq-classimiissanerlunga takusinnaanngilara, Jens B. Frederiksen oqarpoq.
Angalanermi aningaasartuutinik sipaarniuteqarnissaq Demokraatit siulersuisuunerini ukiup ataatsip matuma siornatigut aalajangiussinermik tunngaveqarpoq. Naalakkersuisoqarfinnilu aallaqqaataaniilli tamanna piviusunngortipparput, naalakkersuisunut ilaasortaq oqarpoq.
- Tamatumunnga peqatigitillugu Ineqarnermut, Attaveqaqatigiinnermut Angallannermullu Naalakkersuisoqarfimmi pisortat periaaseq tamanna nammineq piumassutsiminnik atulerniarlugu aalajangersimapput, taamaalilluni Naalakkersuisoqarfitsinni pisortat første classimi angalasarunnaarput. Aningaasaqarnermut Naalakkersuisoqarfimmi aamma taamatut aaqqissuussisoqarniarpoq, tassani Palle Christiansen naalakkersuisuuvoq, Jens B. Frederiksen oqarpoq.
Taamatut periaaseqalerneq Naalakkersuisuni ilaasortat allat partiinit allaneersut atorumassaneraat ilisimaneqanngilaq, taamaattorli Inuit Ataqatigiit qanittukkut tamanna oqaluuseriniaraat, Sermitsiami allaaserineqarpoq.
