Jens B: Siumukkut tukattumik ingerlatsisimanerat iluarsaapparput

Malik Berthelsen aamma kim Kielsen siumumeersut, tusagassiortunut nalunaarusiaanni ineqarnermut naalakkersuisoq Jens B. Frederiksen salluneralugu sakkortuumik isornartorsiorpaat.

Ilaatigut inissianut attartornermut inatsisit unioqqutillugit akinik qaffaasoqarniarnera siumukkormiuusunit pasilliutigineqarsimalluni.

Sakkortuumilli isornartorsiuineq Jens B. Frederiksenip   isumakulunnartoqartinngilaa, ineqarnermullu naalakkersuusimasoq Kim Kielsen puigutunerarlugu.

Inissiat pilersaarutaasumik aserfallattaalisarneqarnissaat pillugu akiisa, 2009-mi qaffanneqaqqullugu 2008-mi qaffanneqaqqullugu Hans Enoksenip naalakkiutigimmagu isumaqatigiissutaareersimagut Jens B. Frederiksenip unioqqutissimanerarpai.

Taamatut iliuuseqarsimaneq nunatta karsianut 14,2 millioner koruuninik akeqarsimavoq, aningaasallu taakku aserfallattaaliinissamut atugassaraluit suli matussuserneqarsimanatik, Jens B. Frederiksen oqarpoq.

Aamma siumukkormiut aningaasatigut tukassaarisimanerat, naalakkersuisut massakkorpiaq iluarsaatileruttornerarlugu, Jens B. Frederiksenip naqissuserpaa.  

Taamanimi pissusiusut malillugit, namminersorlutik oqartussat inissiaataat assigiimmik akeqartinneqarsimammata.

- Qangaanerusoq pissusiviusut qimerlooriarutsigit, taamanikkut siumukkormiut naalakkersuisuutitaqarput, 1987-mi inissiaqarnermut akisussaaffik tigugamikkuli, inissianut akigititat appasippallaartut politikkikkut qanoq iliuuseqarfiginissaat qunugisimavaat. Ilami aserfallattaaliinermut aningaasat atugassat suli amerlanipilussuit, taamanili paasereersissagaluarpaat. Taamatummi akisussaaffeqanngippalaartumik uagut politikkeqartuugaluarutta, meeqqatta atugarisassaat uagut atukkatsinniit, ajornerusunik atugaqalernerinik kinguneqarsimasinnaagaluarput. Ilaatigut aserfallattaaliinermut akissaqarniarneq kinguaattoorutaasimassagaluarluni, Jens B. Frederiksen oqarpoq.

- Taamaammat inissiat ullumikkut ajorluinnarnerannut siumukkormiut ajortussarsiorunnaarlutik akisussaasimanertik akuerisuuppassuk tulluassagaluaqaaq, Jens B. Frederiksen oqarpoq.