Jens B.: Sioorasaarisoqarani oqaloqatigiittoqarli
Doris Jakobsen sakkortuumik oqariartuuteqarluni Kalaallit Nunaanni suliniutinut angisuunut atatillugu sulisinnaanermut qinnuteqaatit suliarinissaannut danskit akimmisaartitsilissagaluarpata Naalagaaffeqatigiinnerup siunissaanik apeqqusiivoq. Jens B. Frederiksenip sioorasaarineq pinnagu oqaloqatigiittoqarnissaa siunnersuutigaa.
-Aallarniutigalugu naqissuserlara, Demokraatini pakatsissaqigatta Folketingimi amerlanerussuteqartut ingerlatanut annertuunut atatillugu sulisinnaanermut qinnuteqaatit eqaannerusumik suliarinissaannut Folketingimi amerlanerussuteqartut akimmisaartitsilissagaluarpata. Isumaqarpugut ingerlatat annertuut pillugit inatsisit pitsaasuusoq, nunami maani suliffissuarnik nutaanik annertuunillu ineriartortitsinissaq qulakkeerneqartussaammat peqataanillu sanaartornerup nalaani sulisartunik akiluttortitsinissaq pinngitsoortinneqartussaammat, Jens B. Frederiksen oqarpoq.
Demokraatit siulittaasuata qularutiginngilaa suliniutinut angisuunut inatsisip pitsaaquutai danskit politikeriisa paasiartulerumaaraat, taamaattumillu Naalakkersuisut kaammattorsimallugit Christiansborgimi isumasioqatigiisitsissasut, ukiortaami januarip aallartisimalernerani pisussaq ilasseqatigiinnissaq iluatsillugu, tassani kalaallit pisortatigoortumik danskit aalajangiisartut kattuffiillu qaaqqussavagut suliniutit angisuut kingunissaalu pillugit tusarnaariaqqullugit. Demokraatit neriuutigaat upperalugulu, aaqqissuussinerup taamaattup danskit politikerii uisikkumaarai.
-Paarlattuanillu isumaqarpugut danskit politikeriisa ilaat Doris Jakobsenimit isumaqataanillu qunuarineqarnavianngitsut ingerlatat annertuut pillugit inatsimmut, Inatsisartuni akuerineqaqqammersumut angeqqullugit. Periuseq kukkulluinnarpoq. Demokraatini oqaloqatigiinneq piumaneruarput aamma Doris Jakobsen kaammattorusupparput oqaloqatigiinnermut tutsuviginartumik qaammarsaanertalimmut peqataaqqullugu, tangeqanngitsumik qunusaaripajoqinani, taama pissuseqarneq asuli akorngutaaginnarsinnaammat, Jens B. Frederiksen tusagassiorfinnut nalunaateqarluni allappoq.
