Jens B: Nick Nielsen salluvoq

Nunatsinni Isiginnaartitsivik taamaalilluni kingumut aalassaallatitsivoq. Jens B. Frederiksen isumaqarpoq pissutsit pillugit Nick Nielsen sallusoq, tamannalu Jens B. Frederiksenip tusagassiuutinut nalunaarummini nassuiaateqarfigalugu puffassimaarutigaa.

Kulturimut Naalakkersuisup tusagassiuutinut nalunaarutaani kiisalu § 37 naapertorlugu Jens B. Frederiksenip apeqqutaanut akissummi sallusoqarsimanerarpaa.

- 28. novembari Nick Nielsen tusagassiuutinut nalunaarummi allappoq, Nunatsinni Isiginnaartitsivik 11. novembari Naalakkersuisoqarfiup saaffiginnissutaanut akissuteqarsimanngitsoq. Tamanna eqqunngilaq. Nunatsinni Isiginnaartitsivik 14. novembari saaffiginnissummut akissuteqarpoq. Tamatuma kingorna Naalakkersuisoqarfik Nunatsinnilu Isiginnaartitsivik attaveqatigiittuarput, naggataatigullu 28. novembari ataatsimeeqatigiinnissaq siumaqatigiissutigineqarluni, Jens B. Frederiksen nassuiaavoq.

§ 37 napertorlugu Nunatsinni Isiginnaartitsivik pillugu Jens B. Frederiksenip apeqqutaanut akissutini Nick Nielsenip eqqunngitsumik paasissutissiinini nagippaa. Nick nielsenip eqqunngitsumik paasissutissiisarneri Frederiksenip taakkartorpat, Demokraatillu isumaat naapertorlugu tamanna Nick Nielsenip Naalakkersuisuuneranut sunniuteqartariaqarput.

- Demokraatit isumaat naapertorlugu Nick Nielsen Naalakkersuisuuginnarsinnaanngilaq, piaarnerpaamillu Naalakkersuisut siulittaasuannut tunuarniuteqartariaqarluni. Taamaanngippat Naalakkersuisut siulittaasuat kaammatussavarput sassarluni Nick Nielsen tunuarteqqullugu, Jens B. Frederiksen siunnersuivoq.