Jens B. naveertippoq

Qaqortumi mittarfiliorniarnermut pilersaarutinut tunngatillugu Inatsisartut sanaartornermut avatangiisinullu ataatsimiititaliaat amigartumik paasissutissineqarsimasutut misigisimavoq. Ineqarnermut, Attavinnut Angallannermullu naalakkersuisup, Jens B. Frederiksenip, ataatsimiititaliamut paasissutissanik tunioraanissamik pisussaaffini sumiginnartarsimagamiuk naveersissutigaa.
novembarip 30-at 2012 06:22

Inatsisartuni Sanaartornermut Avatangiisinullu ataatsimiititaliami siulittaasup, Juliane Henningsenip, oqarnera naapertorlugu, Kommune Kujallermi kommunalbestyrelsi, Naalakkersuisoq, Jens B. Frederiksen, aamma Air Greenlandip pisortaa ataatsimiimmata, ataatsimiititaliami ilaasortat tusagassiuutit aqqutigalugit qanoq pisoqarneranik ilisimatinneqartarsimapput.

Qaqortumi mittarfissaq pillugu tusagassiuutit sukumiisumik sammereeraallu sumut killittoqarnersoq ataatsimiititaliami ilaasortat Jens B. Frederiksenimit paasissutissinneqarsinnaasimapput.

- Jens B. Frederiksenip allakkatigut nassuiaataa atuaratsigu Qaqortumi timmisartoqarfissap sumut inississinnaaneranut misissuititsinermi nalunaarusiaqartoq aatsaat paasivarput, nassuiaaneralu naapertorlugu mittarfissamut tunngatillugu aningaasanik missingersuinerit utaqqineqaannarput, taannalu pissarsiarineqariarpat mittarfimmik sanaartornissamut aalajangiinissamut tunngavissat suliarineqaleriaannaasut paasitinneqarluta, Inatsisartuni Sanaartornermut- Avatangiisinullu ataatsimiititaliami ilaasortat tusagassiuutinut nalunaarutiminni allapput.

Mittarfiup Narsarsuarmiittup Qaqortumut nuunneqartussanngorneratut nipilimmik tusagassiuutini saqqummiunneqarsimanera ataatsimiititaliami siulittaasup uggornarnerarpaa, qanormi pisoqassanersoq Inatsisartuni aalajangerneqaqqaartussaammat.