Jens B: Maleruagassat piumasaannarmik nassuiarniagassaanngillat
Jens B. Frederiksenip erseqqissarlugu oqaatigaa, Qorlortorsuaq pillugu saqitsaassutaasup, Narsami Qaqortumilu atuisut qaffasinnerusumik akiliisussanngornerannut Naalakkersuisut Nukissiorfiilluunniit alajangiisimanngitsut.
Assigiimmik akeqartitsinerup siunertaraa, sumiiffinni ataasiakkaani innaallagissamik atuisut atuinerisa nalinganik akiliisussaammata. Soorlu innaallagissiorfiit erngup nukinganik nukissiorfiit sakkortusaaviillu sananeqarnerinut akit assigalugit.
Saqitsaassutaasunut aningaasartuutit Narsami Qaqortumilu atuisut kisimik akilertussaanngikkaat, Jens B. Frederiksenip erseqqissaatigaa.
Innaallagissamut akiliutip qaffasinnerpaaffianit illersugaapput. Taakkua nunatsinni illoqarfinni allani atuisunit soorlu Sisimiuni Nuummilu atuisunit akilersorneqarput, aningaasaqarnermut inatsit aqqutigalugu.
Jens B. Frederiksenip erseqqissarpaa, nunatsinni sumiiffinni amerlanerni innaallagissap akia ukiortaamiit appariarsimammat. Kilowatt-timemut akisunerpaaffia 3,48 koruuninit 3,33 koruuninut appartinneqarluni.