Jens B.: Ilulissani sanaartuinnassapput

Aningaasat immikkoortinneqareerput. Aningaasaqarnermut ataatsimiititaliap akuersissuteqarnissaa Qaasuitsup Kommuniata utaqqiinnassavaa, siunersuut ukiunut tulleriinnut pilersaarutinut ilaannginnera kinguartoornermut pissutaavoq. Ineqarnermut naalakkersuisoq Jens B. Frederiksen Ilulissani sanaartortoqarnissaa pillugu taama oqaaseqarpoq.

- Naatsorsuutigivara atsioqatigiinneq qanittumi pisinnaassasoq, taava suliassaq aallartinneqarsinnaasoq. Ineqarnermut naalakkersuisoq Jens B. Frederiksen oqarpoq.

Qaasuitsup Kommuniani borgmesterip Jess Svanep ullumi radioavisimut oqaatigaa, Ilulissani sulisitsisut peqatigiiffianniit iliuuseqartoqarnissaanik piumasaqaammik nalunaaruteqartoqarsimasoq.

Sanaartornermut sullissinermullu tunngasut, Ilulissani ilungersunaqisut, sulisitsisut peqatigiiffiannit oqaatigineqarpoq, sanaartugassanik aallartitsisoqartannginnera pissutigalugu. Tamannalu sulisunik 120-nik soraartitsinernik kinguneqarsinnaasoq oqaatigalugu. Taama oqaaseqartoqarnera Qaasuitsup Kommuniani borgmesterip ernumartoqartippaa. Jess Svane isumaqarpoq naalakkersuisut arriippallaamik una pillugu sulisimasut.

- Suliat sumut killinnersut uanga Naalakkersuisoqarfinniit Qaasuitsup Kommunianut nalunaarutigineqartarpoq sumut suliat killinnersut.

Jens B. Frederiksen taama oqarpoq. Taassuma pingaartinneruaa suliami uani eqqortumik sulisoqassasoq.

Jess Svane ullup qeqqanut radioaviisimut oqarpoq, ajuusaarutigalugu atuarfiup Mathias Storchip iluarsarneqarnissaanut allilerneqarnissaanullu Naalakkersuisut akissuteqarsimanngimmata.

Atuarfiup Mathias Storchip Ilulissaniittup suliarineqarnissaani teknikkikkut ajornartorsiortoqartarsimasoq Jens B. Frederiksen oqarpoq.

- Teknikkikkut ajornartorsiulaartarsimavugut. Assersuutigalugu suliassaq Mathias Storch-imut tunngasoq, taanna ukiuni arlalinni ingerlasussaavoq. Taamaallaalli ukiuni pingasuni aaliangiisinnaaneq killeqartussaavoq inatsisit naapertorlugit. Taamaattumik teknikkikkut aaqqissuisoqarsimavoq, aaliangiiffigineqareerporli naalakkersuisuniit Mathias Storch suliarineqassasoq, neriuutigaarpullu suliaq qanittumi aallartinneqarsinnaassasoq, Jens B. Frederiksen nassuiaavoq.

Qaasuitsup Kommunia imaaliallaannaq aningaasanik sanaartornermut atorneqartussanik tunineqarsimanngitsut, eqqortumik sulisoqarnissaanut pappialarsornerit peqqutaallutik.

Qaasuitsup Kommuniani nunaqarfinni atuarfiit pingasut iluarsartuunneqassasut, Naalakkersuisut aaliangereernikuuaat. Aningaasat taakkununnga atorneqartussat Qaasuitsup Kommunianut ikineqartussaasut Jens B. Frederiksenip oqaatigaa. Tassunga tunngatillugu oqaatigineqarpoq Aningaasaqarnermut ataatsimiititaliap iliuuseqarnissaa utaqqiinnarneqartoq.