Jens B. Frederiksen: Naalakkersuisut pissaanermik takutitsipput
- Suliassaq aningaasaqarnermut ataatsimiititaliami ingerlasoq, tassanngaannaq - Siumut ikinnerussuteqariarmat - naak suliaq aningaasaqarnermut ataatsimiititaliami minnerpaamilluunniit naammassisimanngikkaluartoq, oqaluuserisassanngortinneqarpoq, Jens B. Frederiksen oqarpoq nangillunilu:
- Soorunami tamanna uagut iluarisimaanngilarput. Partiit periarfissinneqanngillat iluamik suliassaq ingerlatissallugu, tassani apeqqutaanngilaq suliaq qanoq imaqartinginersoq, una pivarput nikanarsaanerusoq aningaasaqarnermut ataatsimiititaliap suliassaanik.
Inatsisartut siulittaasoqarfianinngaanniit aqutsineq qanoq ingaajuk?
- Uagut aqutsinera iluarinngilarput, arlaleriarluta nappaalluta mattunneqarpugut, naak suli oqaasissaqartugut. Soorunami taanna pissusissamisuunngilaq. Allaanngiivippoq oqallinneq Naalakkersuisut Siulittaasuata aqukkaa.
- Naalakkersuisut aallaqqaataaniik paasissutissanik naammattunik tunisisaraluarpata, aningaasaqarnermut ataatsimiititaliaq apeqquteqartassanngikkaluarpoq, kisianni Hans Enoksenip tassuuna takutiinnarpaa inatsisartunut ataatsimmititalianullu ataqqinninnini qanoq annikitsigisoq, Jens B. Frederiksen oqarpoq.
Aamma Esmar Bergstrømip Inuit Ataqatigiinneersup Siumut Atassullu pissaanermik takutitsiniarnerarlugit oqaatigai.
- Aalajangigassat paasilluarsimatinnagit aalajangiisoqaraangat, Inatsisartuni sulineq pitsaanngitsumik ingerlanneqalertarpoq, Esmer Berstrøm oqarpoq.