Jens B. Frederiksen: Naalakkersuisut akuersissuteqarnerat akueriuminaappoq

Qalerallit 500 tonsit nunami suliarineqartussatut pisassiissutigineqartut Nukik Seafoodimit suliarineqarsinnaasimanngillat, qerititsivimmiiginnarmatalu avammut tunineqarsinnaanissaat naalakkersuisunit akuersissutigineqarpoq.

Naalakkersuisut taamatut aalajangiinerat Demokraatit sinnerlugit inatsisartuni ilaasortap Jens B. Frederiksenip apeqquserpaa. Jens B. Frederiksen ima oqarpoq:

- Nukik Seafoodimut tamanna qanoq kinguneqassanersoq assorujussuaq paaserusunnarpoq. Pisassiinermi piumasaqaateqartoqarpoq, taakkulu naammassineqartariaqarput. Qalerallit pisassiissutigineqartut nunatsinni suliarineqarnissaat naalakkersuisut piumasarinikuuaat, Sigguk A/S-imulli tunniussat nunami suliarineqaratik umiarsuarmi suliarineqarput, saniatigullu Nukik Seafood-ip pisai suliarineqaqqaarnatik avammut tunineqalerput. Tamanna ernumanarpoq, Demokraatit aalisarnermut politikkimut oqaaseqartartuat Jens B. Frederiksen oqarpoq, nangillunilu:

- Taamaaliortoqassappat suliffeqarfiit annaaneqassapput, tamannalu akueriumaatsorujussuuvoq, Jens B. Frederiksen oqarpoq.