Jens B. Frederiksen: Misissuisoqartariaqarpoq

Namminersornerullutik Oqartussat illuutaannik nalikilliliisarneq pillugu Inatsisartut Kukkunersiuinermut Ataatsimiititaliaa misissuisitsinissamut pisussaaffilerneqassasoq, Demokraatineersup Jens B. Frederiksenip piumasaraa, Inatsisartunilu aqagu oqaluuserisassanngortillugu. Arlaannaannulluunniit pituttugaanngitsunit misissuisoqassasoq Demokraatit piumasaraat, Namminersornerullutillu Oqartussat kukkunersiuisuisa Deloitte-kkut misissuisoqarnissaanik Ataatsimiititaliamut innersuussuteqarnikuupput, Demokraatillu assinganik maanna piumasaqalerlutik.

Jens B. Frederiksen ima tunngavilersorpoq:

- Illut tuniniarneqarneranni nikingassutaanit akileraartoqassanngitsoq Akileraartarnermut Pisortaqarfiup nalunaarutigisimavaa, kukkunersiuisulli Deloitte-kkut akerlianik isumaqarput, avataninngaanneersunillu misissuisoqartariaqartoq innersuussutigalugu, Jens B. Frederiksen oqarpoq, nangipporlu:

- Inatsisartut Kukkunersiuinermut Ataatsimiititaliaani ilaasortat amerlanerussuteqartut tamanna piumasarisimanngimassuk periarfissaqarpunga malittarisassat naapertorlugit Inatsisartunut aalajangigassanngortissallugu, Namminersornerullutillu Oqartussat namminneq kukkunersiuisuisa misissuinissamik innersuussuteqarnerat suliassaq soqutiginartorujussuuvoq, Jens B. Frederiksen oqarpoq.

Namminersornerullutik Oqartussat pisortaanerata, Kaj Kleistip, tusagassiutinut nalunaarummi oqaatigaa politikerit atorfilittallu malittarisassanik atornerluisimanngitsut.

- Pisortanut illugitinneqartut inatsisit atuuttut malillugit tunineqarput, Kaj Kleist allappoq.