Naalakkersuisut nunatta avannaani piniartunut qilalukkanik qernertanik 100-nik pisasseeqqinnermikkut pisussutinik uumassusilinnik ataqqinninnginnertik ersersikkaat, Demokraatit sinnerlugit inatsisartuni ilaasortaq Jens B. Frederiksen oqarpoq.
Piujuaannartitsinnissaq eqqarsaatigineqartariaqartoq Demokraatit aamma oqarput.
- Pisassiissutigineqartut katillutik 385-inngorput, Pinngortitaleriffiup NAMMCO-llu innersuussutaanit pingasoriaammik annertussuseqalerlutik. Tamanna soorunami akuerisinnaanngilarput, naalakkersuisullu piumasaannarsorlutik taamatut pisassiissutinik qaffaanerat orniginartinngilarput, Jens B. Frederiksen oqarpoq, nangillunilu:
- Qilalukkat nunaminngaanniit takuneqarsinnaasut amerlagineqarsinnaapput, silaannarminngaanniilli kisitsinikkut amerlassusaat aatsaat qulaajarneqarsinnaavoq. Siunissami piniagassaqassagutta eqqarsarluaqqaarluta pisariaqarpugut, Jens B. Frederiksen oqarpoq.
Demokraatit sinnerlugit inatsisartuni ilaasortaq Jens B. Frederiksen taama oqarpoq.
Qilalukkanik kisitsinissamut atugassanik amerlanerusunik aningaasaliisoqartariaqartoq Demokraatit aamma isumaqarput.
