Jens B. Frederiksen anisitaavoq

Demokraatit siulittaasussaattut piukkussaq Jens B. Frederiksen Demokraatit Nuummi immikkoortortaata iluminnilu pissaaneqarniuttut anisippaat. Jens B. Frederiksen aperaarput parteeqatiniit anisitaaneq qanoq innersoq.
maajip 03-at 2008 16:56

- Soorunami misigisaq nuanniippoq, ingammik nammineq nalunagu tunngaviginiagaq akuerineqarsinnaanngikkaluartoq, Jens B. Frederiksen oqarpoq.

Taanna nassuiaavoq hovedafdelingip malittarisassaa naapertorlugu hovedbestyrelsemi ilaasortat anisinneqassappata taamaallaat tamanna pisinnaasoq ataatsimeersuartoqartillugu.

Taamatuttaaq anisitsineq pisinnaasoq aatsaat taasisinnaasut pingajorarterutaasa tamanna kissaatigippassuk.

Jens B. Frederiksen aperaarput ilaasortat tamarmik taasisinnaanerat sooq akerlerisimaneraa.

- Malittarisassami erseqqissumik allaqqavoq ataatsimeersuartoqartillugu aatsaat siulittaasussamik toqqaasoqarsinnaasoq, taannalu soorunami ataqqivarput, oqarpoq.

Taanna erseqqissaavoq Nuuk demokraatit erseqqissaassutigisimagaat Jens B. Frederiksenikkut tamatuminnga malinninngimmata allatut ajornartumik anisitaasariaqarsimasut.

- Kisianni hovedbestyrelsemi ilaasortat tamarmik ataatsimeersuarnermi toqqagaasarput, afdelinginummi ataasiakkaanut aallartitaanngillat. Pisussaatitaappulli Kalaallit Nunaani tamani demokraatinut sullississallutik, ataasiakkaat kisiisa pinnagit, Jens B. Frederiksen oqarpoq.

Aperaarput juulip arfineq-pingajuat ataatsimeersuarnatik suli partiiat isamerataannaanersoq.

- Uanga taanna neriuutiginngilara, politikkerput kusanartorujussuuvoq, programmeqarpugut assigiinngitsorpassuarnik anguniagaqarluta nuanninngilluinnarporlu oqallinneq taamatut sangutinniarneqassappat, Jens B. Frederiksen oqarpoq. Taassuma kissaatiginartuutippaa ataatsimeersuarnerup toqqissisimanartumik naammassineqarnissaa.

Demokraatit siulittaasuat Per Berthelsen oqarpoq, Inatsisartuni ilaasortat Jens B. Frederiksen kiisalu Astrid Fleischer Rex taamatuttaaq Kommunalbestyrelsemi ilaasortap Karen M. Lyngep peersitaanerat tusaatissatut tigugini.

- Demokraatinik tunuliaqutaqarnissartik annaavaat, nunali tamakkerlugu ataatsimeersualerutta periarfissaqarput sangutitsinissaminnut, Per Berthelsen oqarpoq.