Jens B.: Akisuallaassaaq

Piviusunngortinneqarsinnaanissaa akisuallaassanerarpaa, taamaammallu innuttaasut suli politiinut saaffiginnissinnaasarnissaat piumaneruaa, politiit ikiuinissaminnut piareeqqammata pisariaqartitallu isumagisinnaassallugit, naalakkersuisoq Jens B. Frederiksen oqarpoq.
Allattoq Mads Lynge
apriilip 07-at 2011 17:17

Ajornartoornermi maani Nunatsinni nalunaarfissamik ataatsimik saaffigineqarsinnaasumik pilersitsinissaq akisuallaasssoq Ineqarnermut attaveqarnermullu naalakkersuisoq, Jens B. Frederiksen oqarpoq.

Upalungaarsimanermut inatsisiliornermut tunngassuteqartut taassuma akisussaaffigai.

Ajornartoornermi maani Nunatsinni nalunaarfissamik ataatsimik saaffigineqarsinnaasumik normumik pilersitsisoqartariaqartoq, ikiueqqaarsinnaanermut ilitsersuisup, Otto Albrechtsenip, ippassaq unnukkut Radioaviisimi oqaatigigaluarpaa.

Politeeqarfinnut normut illoqarfimmiit illoqarfimmut assigiinngillat. Qatserisartut illoqarfinni arfinilinni normu 113 atorlugu saaffigineqarsinnaapput, illoqarfinni allani toortakkatigut kalerrisaarisoqarsinnaalluni.

Ajornartoornermi normu 112 oqarasuaatit angallattakkat atorlugit saaffigineqarsinnaavoq, oqarasuaatit nalinginnaasut atorlugit sianerfigineqarsinnaanani.

Ajornannginnerusumik kalerriisoqarsinnaanissaa Otto Albrechtsenip taamaattumik ujartorpaa:

- Tamannali piviusunngortinneqarsinnaanissaa akisuallaassaqaaq, piviusunngussagaluarpallu aamma akisussalluni. Innuttaasut politiinut saaffiginnissinnaapput, taakkualu ikiuinissaminnut piareeqqapput, pisariaqartitallu isumagisinnaassallugit, naalakkersuisoq Jens B. Frederiksen oqarpoq.

Ajornartoornermik Nunatsinni nalunaarfiusinnaasussamik ataatsimik pilersitsisoqassanersoq, taassuma oqaatigisinnaannginnerarpaa.

- Pisariaqartitat suunersut paasiniarneqaqqaartariaqassaaq, misissuinissamillu pilersaaruteqartoqanngilaq, Jens B. Frederiksen oqarpoq.